Senî ke Dêrsim de Sey Qajî westaya deyîranê xemgîn û hîsan o, Sayder zî westaya deyîranê eşq û sewdayan o. Sayder bi deyîranê xo yê eşq û sewdayan Dêrsim de şaîro tewr namdaran ra yew o.
Şaîr Sayder, mîyanê şarî bi nameyanê cîyayan ameyo şinasnayene: Sayder, Seycan, Saycan, Sah Heyder û Sayê Alê Moşî. Mezraya Gomê Seydû ya qezaya Pilemurîye ya Dêrsimî ra, keyeyê Avasê Xidû ra lajê Alîyê Moşî yo. Sayder domanîya xo ra wayîrê vengêkê weşî bîyo û rew ra dest bi vatişê deyîranê eşq û sewda keno. Rena nê serran de dest bi kemane keno û xo no war de aver de beno. Yeno texmînkerdene ke mabênê serranê 1892-1916/1917 ciwîyayo.
Goreyê xebera ANF’î senî ke Dêrsim de Sey Qajî westaya deyîranê xemgîn û hîsan o, Sayder zî westaya deyîranê eşq û sewdayan o. Sayder bi deyîranê xo yê eşq û sewdayan Dêrsim de şaîro tewr namdaran ra yew o.
Sayder mabênê serranê 1916-1917 de, Şevdîn de vera artêşa Rusan tewrê hêzanê mîlîsan beno. Nê şerî de zî şehît beno. Mabênê mîlîsan de bi nameyê Dursînî yew lajê apê ci zî est o. Cepheyê Şevdîn de verê Dursun şehîd beno. Sayder zî beno birîndar û birîna xo zaf giran bena. Sayderî birîndar anê dewa Herdîfî, badê zî anê mezraya Balixî ya dewa Cîvrakî. Pîyê ci Alîyê Moşî û şaîr Sey Qajî wexto ke pêhesînê Sayder bîyo birîndar û ardo Mezraya Balixî, ê zî şonê bi uca. Waya Sayderî ya pîle na mezra de Alîyê Melemî de zewejîyayî ya û bi waştişê aye Sayderî Balix de wedanê.
Sayder çend serrî de şehîd bîyo nêno zanayene labelê goreyê vatişê kokimanê Dêrsimî 35-36 serrî de bîyo. Emrê xo yê kilmî de nêzdîyê 101 deyîrê viraştê. Tornê Alîyê Melemî Alî Demîrelî bade seba Şayderî mezarêka başe viraşta. Ewro zî hîna zaf kesî şinê dîyarê ci û vilakan mezela ey ser o nanê ro û ey yad kene.
Cêr ra yew deyîra ey a ke zaf yena zanitenê şima di bivînê.
“CANÊ CANÊ
Erê canî canî
Rowa mi canî
Gozaga gerdanê şîşî rake
Ez xo rê lewê panî,
Tom dano fekê mordemî
Zê dendikê goza Hîndîstanî
Perê kenê şêm û qurişî
Cor ra ronî mirzanî
Kosû de heqa tû ya
To cûwanike
Defter no ro goyulû,
Ez xo rê biwanî,
Ere no Derdê zerî yo,
Butu mi rê benê
Name û nîsanî
Seveta zere û goyulû
Mi se û zû kilame vata,
Pero kerdê tamamî
Dî-rê çekû kêmî yê
To kenu ser de
Hurênya îmamî.”
