Endamê Heyetê Îmraliyî yê DEM Partî Mîthat Sancarî ke konferansê Parlementoyê Ewropa de qisey kerd, vat ganî prosesê dîyaloyî yê mabênê kurdan û tirkan parlamento de bêro destgirewtene û zemînê sîyasî û huqûqî rê bêro kiriştene.
Parlamentoyê Ewropa de derheqê prosesê dîyalogê Tirkîya û kurdan de konferansêk ame organîzekerdene.
Endama Heyetê Îdareyî yê EUTCC’yî Dr. Dersim Dagdevîren qiseykerdişê akerdişî kerd û Prosesê Haştîye û Komelê Demokratîkî erjna.
Grûba S&D’yî ra Andreas Schiederî zî Raybe Apo sey “Mandelayê kurdan” name kerd û vat o paştî dano waştişanê kurdan.
Dima ra bi moderatorîya rojnamegere Amberîne Zaman Endamê Heyetê Îmraliyî yê DEM Partî Mîthat Sancarî qisey kerd. Sancarî ke almankî qisey kerd, ard ziwan ke eslê xo de bi prosesê çareserîya problemê giranî yena hedefgirewene û vat: “Akerdişê rayîrê çareserî û semedê çareserî eştişê gaman a ke hewce kenê. Haştîya mendî yena hedefkerdene. Proses ganî hinî parlemento de bêro destgirewtene û zemînê sîyasî û huqûqî rê bêro kiriştene.”
Sancarî îfade kerd ke ganî heme problemî bi sîyasetî bêrê destgirewtene û vat: “Verê ma de zaf çîyê ke ganî bêrê kerdene est ê. Ganî ma bizanê ke no proses semedê kurdan prosesêko tarîxî yo. Proses têna semedê hetêkî ney, semedê heme herême muhîm o. Ganî ma ney xo vîra mekerê. Eke waro biasayîş bêro pêardene, no têna nîno manaya haştîye; semedê Tirkîya û heme herême bena gamêka ver bi haştîye. No do tesîrê welatanê bînan zî bikero. Wezîfe muhîm o, berpirsîyarîye giran a û no raşta muhîm o. Ganî proses ser bikewo. Resayîşê haştîye eynî wextî de resayîşê demokrasî yo. Goreyê ma haştîye û demokrasî yewbînan rê girêdaye yê.”
Dr. Ayhan Işik zî bale ante prosesanê verênan ê mabênê Tirkîya û PKK’yî ser û vat ganî meseleya çarçeweya raşte de bêro destgirewtene û rolê aktoranê ke mîyanê prosesî de bêro zelalkerdene.
