Bi pêşengîya TJA, DBP û DEM Partiye de kombîyayîşê şarî yê derheqê vengdayîşê Rayberê Şarê Kurd Abdullah Ocalan ê Aştî û Komelê Demokratîkî de hewteyêk o dewam kenê. Şar kombîyayîşan de wazeno ke kurdî tifaqa xo xurt bikerê.
Rayberê Şarê Kurd Abdullah Ocalan 27ê Sibate de vengdayîşê Aştî û Komelê Demokratîkî kerd. Vengdayîşî de vat: “Rêzgirewtişê nasnameyan, azadîya ramitişî, rêxistinbîyayîşê demokratîkî, awankerdişê civakî-ekonomîkî û sîyasî yê heme pêrabesteyan, tena bi estbîyayîşê komel û qada sîyasî ya demokratîkî mumkîn o” û waşt ke kurdî zêdeyêr sîyasetê demokratîkî aver berê. Reyna peyamê ke cinî û cîwanan rê şirawitbi de zî waşt ke her ca de xo bi rêxistin bikerê.
Ser vengdayîşê Rayberê Şarê Kurd Abdullah Ocalan Rêxistinanê TJA, DBP û DEM Partiye plansazîya nêzdîyê 2 hezar kombîyayîşanê şarî amade kerde û xeylê şaristananê Kurdistanî de dest bi kombîyayîşanê şarî kerd. Çarçewa plansazîya kombîyayîşanê şarî de verî Amed de, dima ra zî xeylê şaristananê bînan de kombîyayîşê şarî ameyêne viraştene.
Amed û qezayanê aye de hewteyêk o her şewe tax û qezayan de kombîyayîşî yenê viraştene. Rojanê peyênan de Agirî, Îdir, Şirnex û xeylê şaristananê bînan de zî kombîyayîşê şarî ameyêne viraştene. Kombîyayîşan de dîwan perspektîfo ke seba prosesî amade bîyo bi pêrabesteyê kombîyayîşî ra pare keno. Kombîyayîşî de pers û ercnayîşê şarî yenê girewtene û înan ser o ercnayîş yenê kerdiş.
‘Dîyaloga bi şarî ra xurt bikerê’
Çarçewa kombîyayîşanê şarî yê seba ercnayîşê prosesî û parekerdişê perspektîfê vengdayîşê 27ê Sibate ke Rayberê Şarê Kurd Rayber Abdullah Ocalanî bi raya umûmîye ra pare kerdo de, şewa bîn qezayanê Hênî û Bismilî yê Amedî de kombîyayîşê şarî ameyî viraştene.
Kombîyayîşan de bi seyan kesî amade bîyî. Qezaya Hênî de bi tewrbîyayîşê nêzdîyê 100 kesî kombîyayîş pê ame. Kombîyayîşî de welatijan ard ziwan ke fîkarê înan dewlete ra estê ke reyna kurdan bixapinê û waşt ke no rayî nêrê xepinayîşî. Welatijan eşkera kerd ke mîyanê partîye de rêxistinîye û diyaloga bi şarî ra qels a û waşt ke verî her çi ra hetê rêxistinî û têkilîya bi şarî ra bêro zêdekerdene.
Dewa Îsapar ya qezaya Bismilî de zî kombîyayîşê şarî ameye viraştene. Kombîyayîşî de zêdeyê 100 welatijî amade bîyî. Nê ca de zî heman waştiş û rexneyî ameyî kerdiş. Welatijan ard ziwan ke hêvî û bawerîya înan rayberê înan û partîya înan ra est a la şikûgumanê xo yê vera dewlete ardî ziwan.
Îdir
Taxa Ozgur ya Merkezê Îdirî de zî kombîyayîşê şarî ya verêne ameye viraştene. Zêdeyê 100 welatijî tewrê kombîyayîşî bîyî. Nê ca de zî kombîyayîş bi rêzgirtişî û parekerdişê perspektîfî dest pê kerde. Kombîyayîşî de welatijan ard ziwan ke ê aştî û aramî wazenê û wazenê ke kurdî tifaqa xo xurt bikerê.
