Sîyasetmedaranê kurd pîrozkerdişê Newroza Agirî de qisey kerd û vat: “Şarê kurdî bi ruhê Newroze yo xoverdayox do Serekê xo, şehîdanê xo û prosesê aştî û komelê demokratîkî rê wayîr vejîyo.”
Bazarê Kehen ê Kayê yê merkezê Agirî de pîrozkerdişê “Newroza Azadî û Yewîya Demokratîke” ame kerdene. Bi hezaran welatîyî beşdar bîyî. Pîrozkerdişî ra ver welatîyan bi deyîran govende girewte. Dayîka cangorîyanê Newroze ra Sema Yuce, Zenûre Yuce, Parlamentera Agirî ya DEM Partî Necla Demîr, Parlamenterê Wanî yê DEM Partî Mahmud Dîndar û Hemşaredarê Wanî yê Şaristanê Girdî Abdullah Zeydan beşdar bîyê.
Ciwanan warê Newroze de û sahneye de posterê gird ê Rayberê Şarê Kurdî Abdullah Ocalanî û Salih Muslimî girewt. Fotografê Rahşan Demîrel, Sema Yuce û Kemal Kurkut zî ameyê girewtene. Deyîrbaz Devrîm Çelîk û Aylîn Demîrkaya sehne de deyîrê xo vatî û şarî govende girewte.
‘Ruhê xoverdayox ma ard waranê Newroze’
Parlamentera Necla Demîr verî qisey kerd û wina vat: “Bi hezaran miletî ameyî şîyî û bi hezaran Dehaqî zî ameyî şîyî. La şarê kurdî vera heme Dehaqan herra xo ser o ciwîyayo û ciwîyeno. No zî bi saya zanayîş, têkoşîn û xoverdayîşî bîyo. Herra Kurdîstanî herra zengîn a, coka her tim dewletî hêrişê herra Kurdîstanî kenê. Şarê kurdî bi ruhê xo yê xoverdayox û bi rayberîya xo resayo roja ewroyî ke waranê azadan de Newroze pîroz keno.
‘Newroze cangorîyan ana ma vîr’
Parlamenter Mahmud Dîndarî zî qisey kerd û ard vîr ke b rojan oşarê kurdî qadan ra yo û vat: “Şar vano ke ganî verê Serekê ma azad bibo, wina no proses bi aramîye aver şino û serkewto beno. Ma zî warê Ehmedê Xanî de veng danê kenê ke ma zî dimayê paradîgmaya Abdullah Ocalanî yê û ganî Rayberê ma azad bibo ke herra ma biba baxçeyê gul û gulîstanan. Seserrî yo ke bi hezaran ciwanê ma şehîd kewtê. Eke ewro nê warî de ma eşkenê qisey bikerê no bi xêrê şehîdanê ma yo. Ma bi nameyê Salih Muslimî heme şehîdanê azadîye yad kenê. Gama ke ma vanê Newroze; Rahşan Demîrel, Mazlum Dogan, Zekîye Alkan… yenê vîrê ma. Bi adirê ke înan bi bedenê xo wekerd, adirê Newroze berz û geş beno. Eynî wext de gama ke ma vanê Newroze; Kemal Kurkut yeno vîrê ma ke bi hewayêko bêexlaq ame kiştene.”
‘Kurdî azadîya rayberê xo û nasnameyê xo wazenê’
Hemşaredarê Wanî Abdullah Zeydanî qisey kerd û nê çîyî vatî: “Ma Newroza heme embazanê xo yê ke hepisxaneyan de yê, ê yê ke Rojava de têkoşîn kenê û kurdê çar parçeyanê Kurdîstanî pîroz kenê. Na Newroze Newroza azadîya Rayberê Şarê Kurdî Abdullah Ocalanî û yewbîyayîşê şarê kurdan a. Eke nê cefayan mîyan de zî şarê kurdî waranê Newroze de yo, manayê naye est o. Manayê ci no yo ke şarê kurdî azadîya Rayberê xo, azadîya sîyasetmedaranê xo, azadîya nasnameyê xo wazeno.”
Qiseykerdişan ra pey Zennure Yuce û sîyasetmedaran adirê Newroze wekerd Dima ciwanan dormeyê adirî de govende girewte.
