Sîyasetmedara kurd a girewta Leyla Guven seba Newroza Colemêrgî mesajêk erşawit û vat: “Ruhê yewîye û pîyabîyayîşî ke bi kede û xebatêka pîl a Rayber Apo mîyanê şarê ma de bi Prosesê Aştî û Komelê Demokratîkî aver şi, ma bawer kenê ke do adirê Newroze hîna gur bibo.”
Colemêrg de bi sloganê “Newroza Azadî û Yewîya Demokratîke” Warê Otogara Tekserî de Newroze ameye pîrozkerdene. Bi hezaran kesî bi cilanê neteweyîyan beşdar bîyî û warê Newroze bi renganê kesk, sûr û zerd xemilna. Temsîlkarê partîyanê sîyasî û sazgehê komelê sîvîl ê demokratîkî zî warê Newroze de cayê xo girewt. Gede û ciwanan bi renganê kesk, sûr û zerd warê Newroze kerd şahîyêka rengîne.
Warê Newroze de pankartê “Bi roşnîya raştîye ver bi azadîye” û “Estbîyayîşê ci nîm seserre yo, la tesîrê ci heta heta yo” ameyê akerdene.
Sirûd ame wendene
Programê Newroze bi deqîqeyêk rêzgirewtişî şexsê Endamê Konseya Hemserekîye yê PYD’yî Salih Muslimî de seba vîrardişê cangorîyanê azadî û demokrasîye dest pêkerd. Wextê rêzgirewtişî de sîrûdê “Çerxa Şorişî” ame wendene û sloganê “Bijî Serok Apo” ame vatene.
Nameyê Komîteya Amadekarî ya Newroze ser o Asya Akgul qisey kerd û vat: “Silam embazanê Rahşan, Bêrîvan û Mazluman rê bo; silam mîrasgirê Kawayan rê bo.”
Hemserekê Colemêrgî yê DEM Partî Behçet Kanat zî bal ante xoverdayîşê şarî yê seba azadîye ser o û Newroza şarî pîroz kerd.
‘Newroza mîmarê azadîye Birêz Ocalanî pîroz bo’
Parlamenterê Colemêrgî yê DEM Partî Vezîr Coşkun Parlakî cangorîyê têkoşînî yad kerd û vat: “Ma bi nameyê Mordem, Şervan, Bêrîvan û Hakî Azadî ke 4 aşman ver hêrişanê vera Rojava de şehîd bîyî heme şehîdê Kurdîstanî bi minet yad kenê. Newroza mîmarê azadîye Birêz Abdullah Ocalanî pîroz bo.”
Parlakî wina dewam kerd: “Senî ke Mazlum Dogan Zindanê Dîyarbekirî de vera îşkence vindert û bi 3 çopanê kibrîtî bedenê xo kerd adirê Newroze, ma do nika ra pey zî nê mîrasî rê wayîr vejîyê û têkoşînê xo girs bikerê. Rayberê Şarê Kurdî bi manîfestoyê xo rayîrê ma roşn kerd. Waşt ke ma çin bikerê û çîyê ke bi rayîra medyaya dîjîtale kenê, wazenê ma Rayberê xo ra dûrî bikerê la ma bi Rayberê xo reyde yê. Prosesê ‘Aştî û Komelê Demokratîkî’ seba Kurdîstana azade û yewbîyayîşê neteweyî yê kurdan zaf muhîm o. No zî bi fikrê Birêz Ocalanî aver şi.”
Adir bi govende ame wekerdiş
Qiseykerdişan ra dima Dayîkanê Aştî adirê Newroze wekerd. Girseyî warê Newroze de dormeyê adirê Newroze de dest bi govende kerd.
Dima mesajê sîyasetmedara kurd Leyla Guven ke Hepisxaneyê Cinîyan ê Sîncana Anqara de ya, ame wendene:
Mesajê Leyla Guven wina yo:
“Reyna Newroze ya; rojê ke koyê xemilîyenê, hêvîyî resenê zîrve, xoza bi heme heybetê xo dinya rengîn kena û cuya newîye û azade bi destê cinîye newe ra awan bena. Ez vernîya îradeya şarê Colemêrgî yê fedakar û qehreman de ke seba ke Newroze sey roşan bêro pîrozkerdene, bedelê giranî dayî, bi hurmet serê xo tewînena. Ez zerrî ra hêvî kena ke na Newroze seba şarê ma azadîye û seba Rojhelatê Mîyanênî demokrasî û aştî bîyara.
Adirê Newroze ke şima Colemêrg de wekerd, do adirê Qamişlo û Hewlêrî reyde bibo yew û biresê way û birayê ma yê ke Mehabadî de yê. Silam heme şehîdê ma yê qehreman ê ke rayîrê statuyê şarê kurdan de nemir bîyî. Ez Newroza şarê ma yê Colemêrg, Gever, Çelê, Şemzînan û Rûbarokê zerrî ra û bi can pîroz kena, destê dayîka ma ya zerrîşewat maçî kena. Newroze pîroz bo.”
Pîrozkerdişê Newroze bi konserê Koma Hevra dewam keno.
