Şarê Amedî vengdayîşo tarixî yê Rayberê Şarê Kurdî Abdullah Ocalanî ra pey gamenêeştişê dewlete rê reaksîyon mojna û vat: “Tecrîd hema zî dewam keno. Ganî Rayber Apo azad bibo. Nê ke proses aver nêşono.”
Vengdayîşo tarixî “Aştî û Komelo Demokratîk” yê Rayberê Şarê Kurdî Abdullah Ocalanî ke 27 sibate de ame parekerdene, heme dinya de gulbang da. Derheqê vengdayîşo tarixî de nîqaşî dewam kenê. Vengdayîşî ser o aşmêk vîyarta la dewlete tu gamê şênberî nêeştê.
Şarê Amedî derheqê na babete de ajansê Mezopotamya (MA) rê hêvî û rexneyê xo ardî ziwan.
‘Îqtîdar gaman nêerzeno’
Welatijan ra Fuat Oren dîyar kerd ke muxatabanê vengdayîşî ra yew a la heta nika zî tu gamê şênberî nêeştê û vat: “Demo ke înan gamî eştê ma do çar gaman bierzê. Ganî gaman bierza ke ma zî bieşkê aye ra bawer bikê. La hema zî gamî nêeştê. Mi nê prosesî ra çîyêk fehm nêkerd.”
‘Ganî Ocalan azad bo’
Faîk Kurt ard ziwank ke ê aştî wazenê la dewlete xo nêdana ver û wina dewam kerd: “Rayberê ma girewte yo. Eke teberî ra bibîyêne xora no problem nêbîyêne. Heta Raybertî azad nêbo aştî zî nêbena.”
‘Îqtîdar bawerî nêdano’
Semra Akin zî seba girewteyanê sîyasîyan reaksîyon mojna. Semra Akin girewtişê Şaredarê Stenbolî yê Şaristanê Girdî Ekrem Îmamoglu zî ard vîrî û vat ke îqtîdar xo ra vêşêr kesî nêwazeno. Semra Akin vat: “Kam sere wedarno ca de erzenê zindan. Coka ma ci ra bawer nêkenê. Ma do kam kesêko winasînî ra bawer bikero? Yanî hetêk ra vano aştî heto bînî ra zî polîtîkayanê şerî domneno. Eke ti wazenê ma reyde aştî bikî, o wext ti çira hêrişê ma kenê? Ma pêro nê erdî ser o ciwîyenê û ma wa û bira yê.”
Nazîme Alan zî vat ke yewin waştişê înan aştî û pîya ciwîyayîş o û nê çîyî vatê: “Ma wazenê mîyanê aramî de biciwîyê. Ganî seba aştî gamî bêrê eştene.”
‘Bi azadîya Ocalanî proses eşkeno aver şêro’
Salîh Budak zî dîyar kerd ke waştişê înan aştîyêka birûmet o wina vat: “Seba ke dewlete gamanê şênberan nêerzena, bawerîya ma qels bena. Aştî do seba tirkan, kurdan û heme şaran baş ba. Vengdayîşê Rayber Apoyî xeylê watedar û muhîm o. Herinda ke ganî vejîyo, prosesî aver bero, tecrîdî domnenê. Çi wext veradîyo, do o wext çîyê başî bibê. O wext beno ke vengdayîşanê hîna pîlan û weşan bikero û bîyaro ca. Ganî Rayber Apo azad bibo. Proses o wext eşkeno aver şêro.”
