Dêrsim de mîtîngê 1ê Gulane pêşengîya DİSK û KESK’î ra Meydanê Seyîd Rizayî de ame viraştene. Şarê Dêrsimî ma ajansê marê qise kerd û vat: Serre rind bêro, aştîye bibo.
Dêrsim de mîtîngê 1ê Gulane pêşengîya DİSK û KESK’î ra Meydanê Seyîd Rizayî de ame viraştene. Platformê Ked û Demokrasîya Dêrsimî, DÎSK, ÎHD, YOL ÎŞ, Haber Sen, Egîtîm Sen, KESK, DEM Partî, CHP, Partîzan, TKP, Hemşaredarê Dêrsimî Bîrsen Orhan û Cevdet Konak, kedkarê ke şaredarîya Dêrsimî ra hetê qeyûmî ra îş ra ameyê eştene, vendekarê Zanîngeha Mûnzurî beşdarê mîtîngî bî.
Şarê Dêrsimî bi kêf û eşq daxilê mîtingê 1ê Gulane bî. Hemşaredarê Dêrsimî Cevdet Konak, welatijî Velî Yildiz, Nacîye Mûtlû, Fecîre Can, Sevgî Demîr, Perîhan Kaya ajansê ma rê qisey kerd û va: 1ê Gulane rindîye, weşîye û aştîye bîyaro.
Hemşaredarê Dêrsimî Cevdet Konakî seba na roja pîroze wina qesî kerd: “Miletê ma na se serra newîye de vazeno ke endî nî erdan de zîbayîş mebo, berbîş mebo, zulim mebo. Ma birayîne vazenîme, rindîye vazenîme, raştîye vazenîme. Dewan ra, mezrayan ra, qezayan ra amo îta vano ke na serre serra rindîye bo, serra weşîye bo.”
Welatijanê bînan zî kilmek kilmek wina va:
Velî Yildiz: “Ewro roja karkerana. Karkeran seba na roje xêylî gonî da, ked do. Ma kî ameyîme sebeta rindîye, haştîye. Xirabîye durî şêro. Miletê ma têde amo têlewe vazeno ke haştîye bêro, xirabîye durî şêro. Heqa karkeron cidê, ceynikan û domanan mekişê.”
Nacîye Mûtlû: “Ma sebeta heqa îşçîyan, emekçîyan ameyîme têlewe. Weşîya karkeran, weşîya herkesî, weşîya ceynîyan vazenîme.”
Sevgî Demîr: “Wisar de dar û ber newe beno kewe. Ma ewro ameyîme têlewe metersime, paştîya xo jubinîdime. Pîya jubime ke ma gerê pêt bime. Ma ke durî vindime gulane û aşmê bînî xirab vêrenê ra.”
Pêrîhan Kaya: “1ê gulane miletî rê xêr bêro. Nê rojê mayê, feqîr û fiqarî gurîyê. Hukmat kî weno. Ma naye nêwazenê.”
