CÛDÎ-DER ke qezaya Silopî de seba perwerdeyê ziwanê kurdkî bido, dest bi xebatan kerd. Hemserekê CÛDÎ-DER’î Omer Sansur dîyar kerd ke bi her awayî şarê kurdî polîtîkayanê asmîlasyonî reyde rî bi rî maneno, ê zî seba verê asîmîlasyonî bigê CÛDÎ-DER awan kerdo.
Komeleya Cigêrayîşê Ziwan û Kulturî ya Cûdî (CÛDÎ-DER) 23ê Nîsane de qezaya Silopî ya Şirnexî de ame awankerdene. Dima ronîyayîşî, CÛDÎ-DER dest bi xebatê ziwanê kurdkî kerd û daraxa yewin, diyin de dest bi dayîşê perwerdeyî kerd. CÛDÎ-DER ke nika Merkezê Kultur, Huner û Ziwanî yê Ayşe Şane ke binê banî yê Şaredarîya Silopî de yo, perwerdeyê kurdkî dano demêko kilm de do bi awayêkî xebatê ziwanê kurdkî hera bido averberdiş. Armancê awankerdişê CÛDÎ-DER’î no yo; verê girewtişê polîtîkayê asîmîlasyonî yê ser ziwanê kurdkî yo.
Hemserekê CÛDÎ-DER’î Omer Sansur da zanayîş ke armancê înan verba polîtîkayê asîmîlasyonî bi CÛDÎ-DER’î ra biresnî heme beşanê komelî.
Omer Sansur ard ziwan ke şarê kurd her hetî ra bi polîtîkayê asîmîlasyonî ra rî bi rî maneno û ê zî verba polîtîkayê asîmîlasyonî CÛDÎ-DER awan kerdî û wina va: “Ziwan her çik o, ziwan têkilîya merdim û dorûverî yo. No ser zî wayîrê avzelîyêko gird o. Ma waşt qezaya Silopî de zî sazîyêka ziwanê kurd awan bikî. Ma waşt bi sazîya ziwanê kurdkî xo biresnî komelî û ziwanê kurdkî bonderî komelî bikerî. Mamosteyanê ma zî bi serran ê perwerdeyê ziwanê kurdkî danî. Dewlet her awayî polîtîkayê asîmîlasyonî şarî ser dano ferzkerdiş. Hetê bîn ser medyaya sanalî de zî xususî ser medyaya sanal de zî polîtîkayê asîmîlasyonî yenî averberdiş. No ser zî ma zî waşt bi rayîrê sazîye ser medyaya sanalî zî xo biresnî doman, ciwan û cinîyan û înan bonder ziwan bikerî. Doman û ciwan bi polîtîkayê asîmîlasyonî rî bi rî manenî. Bi armancê vergirewtişê asîmîlasyonî sazîyêka ziwanê kurdkî bi nameyê CÛDÎ-DER’î awan kerd.”
Wa ziwanê kurdkî bibo ziwano fermî
Omer Sansur destnîşan kerd ke ziwanê kurd yew zî ziwanê tewro zengîn o û seba wayîrvejyayîşê ziwanî no veng şarî ra kerd û wina domna: “Nika pêvajoyêk ame destpêkerdiş. Wa na pêvajo de heqê ziwanê kurdkî yê fermî bêro şertkerdene. Sey sazîya ziwanê kurdkî waştişê ma nê yo. Ma dibistan û sazîyê xo hetê fermî zî awan bikerî û heme şaristanê Kurdistanê Bakûrî de perwerdeyê ziwanê kurdkî bêrê dayîş. Ziwan zikê dayîke de destpê keno, heta emrê kes bi peynî bibo. No ser zî wa keye û bi xususî dayîk û pîy ziwan bonderî domanê xo bikerî û komelê ma zî wayîrîya ziwanê xo bikerî. Wa keye bi domanê xo ra kurdkî qise bikerî. Ziwanê kurdkî yew zî ziwanê tewro zengîn o, wa ma zî wayîrî ziwanê xo bivejê û nêveradê ziwanê ma yê zengînî vînî bibo. Wa doman, ciwan û heme kes bêrî qeydê xo sazîye bikerî û perwerdeyê kurdkî bivînî.”
