Şaredarîya Peyasî bi sernameyê ‘Gedeyî ameyoxê komelê azade yê’ virazena, na xebatê ke derheqê gedegehanê zafziwanan de ya de, Wekîla DEM Partîye Beritan Guneş qisey kerd û va ke dewlete waştişê ziwanê dayîke rê paştî bido.
Şaredarîya Peyasî bi sernameyê “Gedeyî ameyoxê komelê azade yê ” komxebatêk virazena. Na xebate ke di rojan do dewam bikera, binaya şaredarîye de virazîyena û tede ameyoxê gedegehanê zafziwanan ser o qiseyî yenî kerdiş.
Hetkarê Hemserekanê Şaredarîya Peyasî Yilmaz Guneş akerdişê komxebate kerd û wina va: “Ma na xebate zaf avzel dîyenî. Şarê kurdî bi serran o bi komînal û hawayêkê tebîî cuyeno, coka ziwan zî kokê xo tebîet ra gêno. Mamosteyanê ma tewr avzelî zî dayîkanê ma yê. Eke dayîkanê ma, ma reyde ziwanê xo qisey bikerî, ma zî do linganê xo ser o bivinderî.”
Na xebat sey nexşerayêka ziwanî ya
Hemserekanê Şaredarîya Peyasî Cengîz Dundar û Berîvan Sîncar zî wina qisey kerdî: “Heşt serran ra dima ma ke tewr verî ameyî şaredarîye, zaf xerabîyayîşî estbî. Çimkî zanîno ke polîtîkayê asîmîlasyonî yê girdi kurdan ser o virazîyayî. No asîmîlasyon vera xo têgêrayîşê pîlî zî estbî. Wendegehanê Zarokistan û Ferzad Kemangerî gelek zorîyan mîyan de xebatanê xo berdî. Serra verîn ma ke şaredarîye kayyuman ra girewte, belkî Zarokistan dewam kerdêne la zereyê ci vila bibî. Ziwanê kurdkî ser o şaredarîyan rê erka pîlî keweno. Na xebat zî sey nexşerayêka ziwanî ya. Di rojan ra dima ke nexşerayîş vejîyo, ma do xebatanê xo yê ziwanî bikerî.”
‘Ma do ziwanê xo ameyoxê xo ra biresnî’
Hemverfeka Komîsyonê Ziwan, Kultur û Hunerî yê DEM Partî Cemîle Turhalli zî komxebate de qisey kerd û wina va: “Bi asîmîlasyonî waştî ke ma vîndî bibî. Ma vera nê polîtîkayanê helînayîşî de xover da. Ewro verê ma de mîrasêko gird est o. Kulturê ma û cografyaya ma mîrasê ma yê. Ma rê tewr girîng no yo ke ma nê mîrasî neslanê neweyî rê biresnî. Ma xebatanê nê yewî kenî. Neslanê neweyî asîmîlasyonî rê teslîmkerdiş, nê mîrasî rê îxanet o. Ewro na komxebatêk dest pêkerda û di rojan do dewam bikera, na xebat zaf girîng a. Ziwanê ma ke neslanê neweyî bireso, çi destê ma ra yeno ma do bikerî, ganî keyeyanê ma zî gedeyanê xo reyde bi ziwanê dayîka xo qise bikerî.”
