Amed de seba ke gedeyî hem keyf bikerê hem zî aktivîteyanê fîzîkî û zîhnî de ca bigîrê, mabênê tarîxanê 19-23 nîsane de “Şayîya Wisarî ya Gedeyan” organîze kena.
Mudirîyetê Şûbeya Xizmetanê Gedeyan a Serekîya Daîreya Xizmetanê Sosyalan, Serekîya Daîreya Xizmetanê Ciwanî û Sporî, Serekîya Daîreya Karê Kulturî û Sosyalan û Serekîya Daîreya Xizmetanê Astengdar û Pîran bi hemkarîye û bi piştgirîya şaredarîyanê qezayan, mabênê tarîxanê 19-23 nîsane de şaristan de Şahîya Wisarî ya Gedeyan organîze kena.
Çalakî de gedeyî beşdarê kodkerdişê robotîkî, rîtim, resim, hunerê Ebruyî, atolyeya drama û felsefe, sporê futbol û basketbolî û nawitişê anîmasyonî benê.
Gedeyî wexto ke keyf kenê, bi aktivîteyanê fîzîkî û zehnî xo aver benê û bi kay û xebatanê atolyeyan zî şansê keyfkerdişî vînenê.
Nawitgehê hunerî do bêro akerdene
Zêdeyêr Qada Ciwîyayîşê Pîya ya Sumerparkî de mabênê tarîxanê 19-23 nîsane de nawitgehê resman ke eseranê boyaxê zeytî ra virazîyayê û gedeyan bi keda xo hazir kerdî, Galerîya Hunerî de do seba zîyaretî bêro akerdene. Nawitgeh, her roje mabênê saetanê 13.00-17.00 de do akerde bo.
Çalakîyî do 5 rojî dewam bikerê
19 nîsane roja şeme Parka Aştî yê Peyasî de taxa Huzurevlerî de; 20 nîsane roja rewşeme Bedenê Hewt Birayan de qezaya Sûrî de, 21 nîsane roja dişeme Parka Tenûre de Taxa Şêx Şamîlî ya Baxlarî de, 22 nîsane roja sêşeme Qada Halî de Taxa Ferîtkoşkî de qezaya Yenîşehîrî de, aktivîteyê sporî, parkurê kayan, kayê aqil û zekayî, çalakîya boyaxkerdişê rîyî û atolyeyê muzîk, resim û felsefe do bêrê organîzekerdene.
Mabênê tarîxanê 19-23 nîsane de zî Qada Ciwîyayîşê Pîya ya Sumerparkî de qezaya Yenîşehîrî de; kodkerdişê robotîkî, viraştişê kaykerdoxanê texteyî, hunerîya viraştişê kerreyan, rîtim, deyîr/kilam, resim, Ebru, heqê gedeyan, atolyeya drama û felsefe, aktivîteyê sporî, nawitişê anîmasyonî bi gedeyan û çalakîyê parkurê kayan do bêrê organîzekerdene. Pêro çalakî mabênê saetanê 14:00-17:00î de do bêrê kerdene.
Reyna çarçewaya çalakîyan de mabênê tarîxanê 19-23 nîsane de nawitişê sînema do bêrê organîzekerdene. Merkezê Kulturî û Kongre yê Çand Amedî de 19 nîsane de “Şînok”, 20 nîsane de “Maşa û Heşo”, 21 nîsane de “Çewlika Keyweşe”, 22 nîsane de “Hîkayeya Kaykerdoxî” 4, 23 nîsane de zî nawitişê filmê “Nîko Vera Roştîyan” do bêro kerdene. Nawitişê fîlman saete 14:00î de do bêrê organîzekerdene.
