Sazgehanê ziwanî yê Şirnexî veng da ke ablûkaya vera Rojava bêra hewanayene û berê Murşîtpinarî seba hetkarîyanê merdimîye bêro akerdene.
Komela Ziwan û Kulturî ya Birca Beleke û Komela Ziwan û Kulturî ya Cûdîyî, derheqê hêrişan û ablûkaya vera Kobanê de eşkerayîye daye. Îdarekarê partîyanê sîyasîyan û temsîlkarê sazgehanê sîvîlan zî beşdar bîyî. Eşkerayîye de pankartê “Pawitişê Rojava pawitişê merdimîye yo, ganî ablûkaya vera Rojava bêra hewanayene” ame akerdene.
Îadarekarê Komele Cahît Akilî eşkerayîye wende û vat ke 6ê çeleyî de HTŞ, DAÎŞ û Tirkîya hêrişê taxanê Şêxmeqsûd û Eşrefîye kerd, banî talan kerdî û destkewteyê kurdan hedêf girewtî. Akilî vat: “Gêsê cinîyêk ke ameyî birnayene sey ‘xenîmet’ ameye dîyene. Vera ablûka zî têkoşîn dewam keno. Seba ke haştîye bêro ganî Tirkîya piştîdayîşê xo yê HTŞ’yî biqedêno, fek dişmenîya kurdan ra verdo û ablûka rew bêro hewanayene. Ganî berê Murşîtpinarê seba hetkarîya merdimîye rew bêro akerdene.”
Parlementarê DEM Partî yê Şirnexî Mehmet Zekî Îrmezî vat: “Şarî uca de cuya hempare awan kerde û bi xoverdayîşî xo pawite. La hêzanê hêrişkeran waşt ke no sîstemo azad, demokratîk û seypê hewanê. Hema herême de rîsk est o. Rojawan xeta ma ya sûr a. 30 rojî yo çeteyî ablûka dewam kenê, dewan talan kenê. No seba Tirkîya şerm o. Ganî rew sînoran de berî bêrê akerdene.”
Eşkerayîye bi şîaranê “Bijî xoverdayîşê Rojava” û “Rojava rûmetê ma yo” qedîya.
