Demê peynî de teda û zilmê ser rojnameger zêdîyayê. Tewro peynî rojnameger ameyê kiştiş, 13 rojnameger ameyê hepskerdiş û heqê 4 rojnamegeran de zî cipersayiş ame akerdiş û temsîlkarê dazanayişî nêrazîbîyayiş nîşan dayê û vatê ke wazenê rojnamegeran bitersnê.
Rojnamegeran Nazim Daştan û Cîhan Bîlgîne 19ê Kanûne de demo ke Sûrîyeya Rojhilat û Bakûrî de xeber teqîp kerdinê hetê Tirkîya, bi teyyarêkê hewayî yê kifşî ameyê kiştiş. Gulistan Dursun, Hayrî Tunç, Enes Sezgîn, Osman Akin, Can Papila, Pinar Gayip û Serpîl Unal ke kiştişê rojnamegeran protesto kerdê, 22ê Kanûne de ameyê hepskerdiş. Heqê rojnameger Seyhan Avşar, Ahmet Dogan û Candan Yildiz de bi mane ke heqê Nazim Daştan û Cîhan Bîlgîne de beyanat dayê heqê înan de cipersayiş ame akerdiş.
Rojnameger Necla Demîr, Rahîme Karvar, Ahmet Gunei, Welat Ekîn, Vedat Oruç û Reyhan Hacioglu yê 17ê Çeleyî de sereştişê keyeyan de ameyê destbendkerdiş, bi îdiaya “endamanê rêxistinî yê terorî yê” ameyê girewtiş. Çarçiweya eynî cipersayişî de rojnameger Eylem Babayîgît 22ê Çeleyî, sereştişê keyeyî de ame destbendkerdiş. Qewimyayişê aşma peynî de verba rojnamegeran pê ameyê, tedayê ser rojnamegeranê Tirkîya hewna ard rojeve.
Teda û zilmê ser dazanayişî
Serekê Cemîyetê Rojnamegeranê Başûrê Rojhilatî (GGC) Felat Bozarslan dîyar kerd ke Tirkîya de tedayê cidî ser rojnamegeran yenê kerdiş. Bozarslan ard ziwan ke Tirkîya de seyî ra 95î çapemenî binê kontrolê komanê nêzê hukmatî de yê û va ke Tirkîya de rojnamegerîya azade hema bivaje çîn a.
Bozarslan wina va: “Rojnamegerî meslegêko wina yo ke kameraya rojnamegeran asteng bikê, çimanê dinya yeno girewtiş. Ger mîkrofonê rojnamegeran bigirêi merdim goşanê dinya gêno. No dem zî ti kes nêeşkeno raştîyan bimuso. Xususî 10 serrê peynî de no teda bi lez û bez dewam keno. Seba xeber û malperê ke goreyê ercnayişê hukmatî hereket nêkenê, asteng kenê. Na rewşe seba ma, tabloya şermî ya.”
Ma do biserkewê
Hemserekê Cemîyetê Rojnamegeranê Dîcle Firatî Selman Çîçek heqê tedayê verba rojnamegeran dîyar kerd ke her roj verba malperê xeberan de benê şahîdê binpêkerdişê heqan. Çîçek vîr ard ke Apê Musayî ra hetanî ewro rojnameger ameyê kiştiş û wina domna: “Nika zêdî 40 embazanê ma yê hepsî est ê la ma serî netewna, pey game nêeşt, ma hîna bi qewetir bîyê. Nika ra pey raştîya bi qewetir biresnê komelî, ma do biserkewê.”
Wa her kes veng bido
Temsîlkarê DÎSK’î yê Basin Îş’î yê Amedî Hakki Boltan dîyar kerd ke hukmat bi armancê xelqkerdişê medyayêka yewziwanî hereket keno û wina qedîna: “Wazenê rojnamegeran binê kontrolê xo bigê la Çapemenîya Azade binê kontrolê kesî de nêxebityena. Dazanayişê heqîqetî domyeno, no ser hepskerdiş û destbendkerdişê embazanê ma sûc o. Embazanê ma karêkî kenê sûc nîyo.”
