Seba nuştox û ziwanzanê kurd Mehmet Emîn Bozarslanî ke dinayaya xo bedelnaya Keyeyê Tezîye yê Odabaşi Bal ê qezaya Rêzanî ya Amed de tezîye ameye ronayene. Birazayê Bozarslanî Mahmût Bozarslanî da zanayene ke datê ey seba şarê kurdî mîrasêk verdayo û vat: “Seydayî ferheng û alfabeya Kurdkî aver berd û ma bi ey sereberz ê ke ma rê mîrasêko winasîn verdayo. No mîrasê ey do her tim rayîrê ma roşnî bikero.
Nuştox û ziwanzanê kurd Mehmet Emîn Bozarslan 92 serrîya xo de 9ê sibate de Swêd de şi heqîya xo. Bozarslan bi serran seba ziwan û edebîyatê Kurdkî xebatê bêemsalî kerdê û ey 45 serrî sirgunî de cuya xo domnaye.
Keyeyê Mehmet Emîn Bozarslanî Keyeyê Tezîye yê Odabaşi Bal ê qezaya Rêzanî ya Amed de tezîye ronaye. Endam û rayberê partîyanê sîyasî, temsîlkarê sazgehanê sîvîl û xeylê kesî keyeyê tezîye zîyaret kerd û keyeyê ey rê serweşîye waşt û dua û fatîhayî wendê. Tezîye do di rojî dewam bikera.
‘Mîrasê ey do her tim rayîrê ma roşnî bikero’
Birazayê Mehmet Emîn Bozarslanî, Mahmût Bozarslanî behsê cuya datê xo kerd û da zanayene ke datê ey xo ra pey mîrasêk verdayo, do ê zî keyeyê ey wayîrê mîrasê ey vejîyê. Mahmût Bozarslanî dîyar kerd ke datê ey seba şarê kurdî mîras û xezîneyêk verdayo û wina vat: “Ma bi şîyayîşê datê xo zaf dejayê. Seba ke ma erjêko zaf giran vîndî kerd. Tena seba ma nê seba şarê kurdî zî merdimêko qedirberz bi. Cuya ey bi pêroyê bi dej vîyarte. Xebatê seba ziwan û edebîyatê Kurdkî rayra berdê, seba xebatanê xo yê Kurdkî bêçare mend ke cuya xo sirgunî de bidomno. Mamoste warê ziwan û edebîyatî de şarê kurdî ser o tesîr kerd. Seyda ewil ferheng û alfabeyî aver berd û ma bi ey sereberz ê ke ma rê mîrasêko winasîn verdayo. No mîrasê ey do her tim rayîrê ma roşnî bikero.”
