Sêrt de seba govendgirewtişî, di domanan ke binê çiman de mendbî, 6 aşmî û 20 rojî, û 3 cinîyanê ciwanan rê zî 10 aşmî cezaya hepisî dîyaye.
Serra verêne kurdê ke bi deyîranê kurdkî govend girewtbî, medyaya dîjîtale ser o bi sîyasetêkê nîjadperestî ameyî hedefkerdiş. Netîceyê parekerdişanê hesabanê nîjadperest û mîlîtarîstan ê medyaya dîjîtale ser o, xeylêk cayanê Kurdîstanî û Tirkîya de zaf kesê ke veyveyan de bi deyîranê kurdkî govend girewtbî, ameyî tepiştiş. Hûmara kesanê ke bi nê hîncetî ameyî tepiştiş û dima zî hepiskerdiş, roj bi roj zêdîyaye.
Sêrt de zî heman çî ame meydan û dariznayîşê 5 kesanê ke seba govendgirewtişî ameybî tepiştiş û 2 yê înan domanî bî, qedîya. Di domanan ke binê çiman de mendbî, bi hîncetê ‘’kerdişê propagandaya rêxistine’’ 6 aşmî û 20 rojî ceza birîyaye û cinîyanê ciwanan Tulîn Taşkesen, Zehra Alver û Edanûr Taşkesen rê zî 10 aşmî cezaya hepisî birîyaye. Mehkeme bi hîncetê ke kesanê behsê ci beno bi deyîra ‘’Lêxe Gerîla Lêxe’’ ‘’çalakîye meşrû kerda’’, cinîyanê ciwanan rê ceza birîye.
Serra verêne qezaya Sêrtî Misirc de yew veyve de doman û cinîyê bi namanê A.T. (17), S.T. (17), Edanûr Taşkesen (19), Fîlîz Taşkesen (42) û Tulîn Taşkesen (21) bi hîncetê ke veyveyêk de bi deyîra ‘’Lêxe Gerîla Lêxe’’ govend girewta, medyaya dîjîtale ser o hetê hesabanê nîjadperestan ra ameyî hedefgirewtiş. Dima ra demêko kilm de nê doman û cinîyî ameyî tepiştiş û 2 ci domanî, 4 kesî ameyî hepiskerdiş. Zehra Alver rê cezaya hepisê keyeyî dîyaye. Doman û cinîyê ciwanî 16ê Tebaxe de, roniştişê yewinî yê Mehkemeya Cezaya Girane ya 2. de ameyî veradayîş. Dariznayîş, dima ke ê tehliye bîy, qedîya.
Govendgirewtiş sey azadîya xoîfadekerdişî nêame qebulkerdiş!
Mehkeme cinîyanê ke bi sûcdarîya ‘’kerdişê propagandaya rêxistine’’ ameyêne dariznayîş rê, bi hîncetanê trajîkomîkan ceza birîye. Cinîya bi nameyê Fîlîz Taşkesen beraat kerde la di domanan rê 6 aşmî û 20 rojî û cinîyanê ciwanan rê zî 10 aşmî cezaya hepisî birîyaye. Heyetê mehkeme qerarê xo de dîyar kerd ke govendgirewtiş sînoranê azadîya xoîfadekerdişî nêvîyarneno. Eynî wext de mehkeme qerarê xo de govendgirewtiş sey viraştişê çalakîya propagandeyî ramojna.
Avûkatan îtîrazê qerarê cezeye kerdê û dosya berdê Mehkemeya Îstînafî.
