Paketê înfazî ke îqtîdarî ard meclîs goreyê pawitişan nîyo. Wekîlê DEM Partî Omer Faruk Gergerlîoglu badê zîyaretê tepişteyan vat seba ke dewlete hela peyêne de peyser game eşte tepişteyî hêrsbîyaye yê.
Paketê înfazî ya desine ya ke îqtîdarî ard meclîs goreyê pawitişan nîyo. Coka sere de DEM Partî zaf hetan vera ci nêrazîbîyayîş mojna. Bi taybetî zî seba ke no paket sey gamêka prosesî yeno hesibnayene û goreyê pawitişan zaf kêm o raştê nêrazîbîyayîn ame.
Wekîlê DEM Partî Omer Faruk Gergerlîoglu bado ke paket ame rojdemê meclîsî şi Zîndanê Gebze de tepişteyê sîyasîyî zîyaret kerdî û derheqê paketî de fîkrê înan girewtî.
Gergerlîogluyê ke derheqê babete de ANF’yî rê erjnayîşî kerdî nê vatî: “Mi Zîndanê Cinîyan ê Gebze zîyaret kerd û her hetî ra tepişteyî goştarî kerdî. Mi îdarekaran de qala problemanê tepişteyan kerd. Ez verî nê vajî pêro tepişteyî şok bîyî. Rixmo ke zafê înan zanê dewlete sozê xo nêtepişena reyna şok bîyî. Merdiman semedê roşanî hazirîya xo kerda la vizêr bi na xebere rijîyayî. Tayê înan nêweş ê, tayê înan extîyar ê, 30 serrî yo zîndan de yê. Tayê înan bi serran o nêeşkenê dadî û babîyê xo bivînê. Înan bi keyfî no paket pawit la xîyalê înan rijîyayî. Seba ke îqtîdarî peyser game eşte tepişteyê nêweş û astengdarî qesawet kenê. Tepişteyî nika menga teşrîna verêne pawenê la paştîya înan dewlete ra pêt nîya. Vera dewlete nêrazîbîyayîşo pîl est o. Seba ke dewlete hela peyêne de peyser game eşte tepişteyî hêrsbîyaye yê.”
