Bêrîvan Cizîrî derheqê Bînevş Agalî de qisey kerd ke Botan de toximê têkoşîn û xoverdayîşê eşto. Bêrîvan Cizîrî wina vat: “Aye vejnayîşêk kerd. Mi zî bi girewtişê nameyê aye têkoşîn de ca girewt û mi zî her tim hewl da ke layiqî nameyê aye biba.”
Bînevş Agal yan zî nameyê aye yo ke Botan de pê yena şinasnayene Bêrîvan, bi helwest, xoverdayîş û têkoşînê xo bîye yew a ke bêmerga hereketê cinîyanê kurdan. Wexto ke 16ê Çeleyê 1989î de cuya xo vîndî kerde, şarê yew bajarî ra wirzna lingan ser. Aye bi têkoşînê xo kurd û êzidîyan rê bîye çimeyê îlhamî. Çend serrî vîyartî zî nameyê aye hema zî ziwanê cinîyan ser o yo.
Bînevş Agal serra 1966î de dewa êzidîyan de dewa qezaya Qûbînî (Beşîrî) ya Batmanî de ameya dinya û nameyê xo destanê kurdan “Cembelîyê Mîrê Hekarî û Bînevşa Narîn”î ra girewto. Keyeyê aye sey zaf keyeyanê êzidîyan mecbur mendo ke riyê zextanê ke badê darbeyê 12ê êlulê 1980î zêde bîyî, koç bikero Ewropa. Bînevş Agal ke badê têkoşînê azadîya kurdan nameyê Bêrîvan girewto, serra 1985î de verê şîye Vakur û Rojhelatê Sûrîye, dima uca ra ameye Qezaya Cizîrî ya Şirnexî. Bînevş Agal ke demêko kilm de ewil hetê cinîyanê Botanî ra dima hetê şarê kurdî ra ameye şinasnayene, 16ê çeleyê 1989î de hêrişê de ke yew keye ser o bi, cuya xo vîndî kerd. Ê tarîxî ra pey nameyê “Bêrîvan” sey efsaneyêk ziwanan ser o gêra.
‘Aye têkoşîn vila kerd’
Bêrîvan Cizîrî îfade kena ke Botan de şinasnayîşê cinî û hişmendîyê nasnameyî ameyîşê Bînevş Agalî reyde aver şîyo û vat: “Embaza Bêrîvan tena Cizîrijan nê heme şarî ser o tesîr kerd. Perwerdeyê xo dî û Rojawanî de xebat kerd. Demêk ra dima ameye Cizîrî. Bi ameyîşê aye Cizîr de hişyarbîyayîş dest pêkerd. Aye şarê ser o zaf tesîrêko gird viraşt. Her keyeyo ke şîyêne, ciwan, cinî û pîlan ser o tesîr kerdêne. Bi taybetî û helwesta xo ya kurdîtîye bale antêne. Bi saya şeklê organîzekerdişê aye û xebatanê aye şarî rêxistinî şinasna.”
