Senatoro fransiz Remi Feraud ke bale ante muhîmîya modelê Rojava yê herême ser o, dîyar kerd ke ganî statuyê xoser ê Rojava bêro naskerdene û vat: “Bêvengîye qebul nêbena. Rojava model o; seba pawitişê nê modelê ganî xebat bêra kerdene.”
Senator Feraudî ke ajansê ANF’yî qisey kerd, dîyar kerd ke hêrişê grûbanê cîhadîstanê ke dewleta tirkan piştî dana qebul nêbenê û endîşe virazenê, wina vat: “Eşkera vînîyeno ke Erdogan, cîhadîstî û rejîmê newe yê Sûrîye; bi feydegirewtişê rewşa komplike ya mîyanneteweyîye ke bi Gronland, Ukrayna û Îran ser o eleqedar a, vera Rojavahamleyê xo kerdî.”
‘Hêrişêko plankerde’
Feraudî vat: “Erdogan xoserîya kurdan ke vakurê Sûrîye de nêzdîyê sînorê Tirkîya de ya, qebul nêkeno. Ewro Kobanî binê dorpêçî de ya û vera vêşanîye ya. Eke vurîyayîşêk nêbo, siba herêmê kurdan ê bînî yê vakurê Sûrîye zî binê tehdîdî de benê.”
‘Kobanî seba her kesî sembol o’
Feraud ke bale ante hêrişanê giranan ê vera Kobanî û vat: “Kobanê tena seba kurdan ney seba herkesî zî sembol o. Kobanî hîna sembol o û raya pêroyî ya dinya de zî muhîmîya xo pawena.”
‘Ganî xoserîye bêro naskerdene’
Senatoro ke vat ke sefereberîya kurdan û komelê kurdan ê Ewropa ser o zî tesîr kerdo, bi taybetî waşt ke Fransa derheqê naskerdişê xoserîya kurdan ê Sûrîye de qerardar bibo: “Ganî heqê kurdan bêro naskerdene. Seba Sûrîyeyêka desentralîze ke unsurê cîya-cîyayan rûmet vînenê ganî ma zor bidê.”
Feraudî ke bale ante xîyanetê serekê Amerîka Donald Trumpî yê vera kurdan zî, dîyar kerd ke Serekkomarê Fransa ganî qerardarêr bibo.
‘Seba Ewropa zî tehluke yo’
Feraudî ard vîrî ke hêrişê Parîsî yê 2015î vera erdanê Sûrîye ameyî plankerdene û dîyar kerd ke hêrişê vera Rojava seba Ewropa zî rîsk virazeno û vat: “Bi hezaran cîhadîstê seba nê hêrişan azad bîyî. No, Ewropa de zî derheqê terorîzmî de rîskêko rasterast o.”
‘Rojava model o, ganî ma bipawê’
Feraudî vat: “Modelê Rojava seba kurdan zaf muhîm o û seba temamê Rojhelatê Mîyanênî hêvîyêka raştikên a. Seba pawitişê Rojava ganî ma bixebitîyê.”
