Platformê Cigêrayîşan ê Koçberî serê sînorê Îranî de eşkerayîyêk da û bale antê serê pêlê muhtemel ê koçberî û wina vat: Ganî herême çare dîyayîşê aştîye, demokratîk û serê bingeyê heqanê merdiman virazîyo.”
Platformê Koçberî, derheqê hêrişê Îsraîl û DYA’yî yê serê Îranî û pêlê koçberî beno ke bi qewimîyo, qezaya Serave ya Wanî, vernîya berê Kapikoyî ke mabênê Rojhelat û Vakurê Kurdîstanî de yo, eşkerayîya çapemenî daye. Eşkerayîya ke pankartê “Wa şar berdêlê şerî nêdo. Koçberkerdişê bi darê zorî rê ney!” ame akerdene, endamê DEM Partî, DBP û Platformê Sazgehanê demokratîk hedre yî bî.
‘Şer rîskê kaosê herêmî vejîyeno meydan’
Hemserekê Komeleya Şopnayîşê Koçberî yê Mezopotamya (GOÇÎZDER) Mehmet Vecîh Aydogan dîyar kerd ke şerê Rojhelatê Mîyanên reyde krîzê koçberî zî dest pêkerdo û wina vat: “Hêrişê ke rojanê peyênan de hetê DYA û Îsraîlî vera Îranî virazîyayê, atmosferê aştî û aramî yê herême xora nazik bî, ver krîzêke girantir berd. Hêrişê ke 28ê sibate de dest pêkerdê û badê misîllemeyê îranî ra Rojhelatê Mîyanên de îhtîlafî bilez zêde bîyê; pêkewtişan rîskê krîzêke heremî yê hîra ke eşkeno tesîrê zaf welatan bikero, veto meydan.”
‘Ganî çareserî virazîyo’
Aydogan vengdayîşê sazgehanê mîyanneteweyî kerd ke heqanê sivîlan bipawê û wina vat: “Ma vengdayîşê heme sazgehanê pêroyî yê eleqedar û mekanîzmayanê mîyanneteweyî kenê ke heqanê sivîlan ê ke neçar mendê koç bikerê bipawê, vernî ro cîyatî bigîrê û heme tedbîranê merdimî yê muhîman bilez bigîrê. Akerdişê berayanê ma seba merdimanê ke neçar mendê şer û polîtîkayanê zextan remenê tercîhêk nîyo, hewceyîyê merdimîye yo. Ma wazenê ke hêrişê serê heme sivîlan cade bêro vindarnayene û herême de çareserî bi hewayê aştîye, demokratîk û serê bingeyê heqanê merdiman virazîyo.”
