Kedkar û welatijê ke beşdarê mîtîngê 1ê Gulane ya Amedî bîyî waştê Rayberê Şarê Kurdî Abdullah Ocalan azad bibo û wina vat: “Wexta Serek Apo azad nêbo, nê welatî de ne aştî virazêna û ne zî azadîye.”
Bi rayberîya KESK, DÎSK, TMMOB, TTB û Platformê Sazgehanê Demokratîkan ê Amedî seba 1ê Gulane Roja Karker û Kedkaran a Dinya de Qada Îstasyonî ya Amed de mîtîngêk organîze kerd. Mîtîngî ra ver girseya ke endamê sazgehananê sîvîlî, partîyanê sîyasî û kedkarî tede bi hezaran kesî Çatrayîrê Semtî de ameyî têhet. Xeylî kesî bi kincanê herêmî beşdarê mîtîngî bîyî. Girse bi sloganê “Biciwîyo xoverdayîşê karkeran”, “Bê Serek cuye nêbena” ver bi Qada Îstasyonî ya rayîr ra şîyî. Mîtîng de qiseykerdoxan bale ante krîzê ekonomî, problemê ke karker û kedkarî pê rîbirî manenê, proseso ke dewam keno û azadîya Rayberê Şarî Kurdî Abdullah Ocalan ser ajansê ma rê qal kerd.
‘Wexta Serek Apo azad nêbo, nê welatî de ne aştî virazêna û ne zî azadî’
Welatijo bi nameyê Mazlum Demiral bale ante rolê Rayberê Şarî Kurdî Abdullah Ocalan ê aştîya komel ser û wina vat: “Rayberê Apo nêzdî 28 serrî mîyanê çar dêsan de yo û seba azadîya şarî nê şarî tekoşîn keno. Wexta Serek Apo azad nêbo, nê welatî de ne aştî virazêna ne zî azadîye. O roşnî û rûmetê ma yo. Şima vînenê, ê ke hêrişê ey kenê sey minafiqanê demê HZ. Muhammedî yê. Ma azadîya ey wazenê, seba ke azadîya Kurdîstanî azadîya ey de ya. Ewropa zî tede, tu hêz nêeşkeno qasî ey xo ver bido. Ganî tecrîd bi lez wedarîyo.”
‘Key Birêz Ocalan azad bi, ma do o wext bi rihê 1ê Gulane û Newroze pîroz bikerê”
Mecît Urgay o ke beşdarî pîrozkerdişê 1ê Gulane bîyo, termê kede bi têkoşînî azadîya ra girêda û îfade kerd ke kedkarê tewr girdî gerîla yê. Mecît Urgay wina domna: “Silam seba nê têkoşînî. 1ê Gulane seba aştîya Kurdîstanî û awankerdena komelêko demokratîk a. La ganî ma raştîye bivînê; kedkarê tewr girdî gerîlayê koyanê Kurdîstanî ser o yê ke ganê xo dane. Kede bi pere nêbena, bi fedekarîya ganî bena. Coka key Birêz Ocalan azad bi û ame Amed, ma do o wext bi rihê 1ê Gulane û Newroze pîroz bikerê. Ez nê roja ro înan pîroz kena.”
‘Lazimîya ma yewîye esta’
Cebraîl Vûralî zî qala xo de bale ante problemanê sinife û kedwerîya ser o wina vat: “1ê Gulane roja xoverdayîşê karkeran a. Bedêlê tewr girdî şarê Kurdî dayê. Kurdî aktorê fikrê serkewteyê şarê dinya yê. Mîmarê na kede û têkoşîne zî Serek Apo yo. Serek Apo zindan de vera heme bê îmkanîyan zî wazeno komelan pê bîyaro. Serek Apo bi rayîrê prosese çareserîya demokratîk ê aştîye mîyanê hewldayîşanê girdan de yo. Dûr yan zî nêzdî no proses do serbikewo. Badê 30 serran ez beşdarê mîtîngê 1ê Gulane bena. Her çend sîstemo ke esto wazeno emrê xo derg bikero û nêwazeno gaman bierzo zî. Ma do ê qanûnan hewadê.”
