Serekeşîrê ereban derheqê mesajo ke Abdullah Ocalan erşawitbi, qisey kerd û vat ke Abdullah Ocalan seba çareserîya krîzanê herême û xurtkerdişê waûbirayîya şaran vîzyonêko sîyasî yê hîra pêşkêş keno.
Rayberê Şarê Kurdî Abdullah Ocalanî hewteyo verên seba serekeşîranê ereban ê herêmanê Cizîr, Dêrazor, Reqa û Tebqa mektubêk erşawitbi û mesajê “Ez paştî dana waûbirayî û pawitişê şaranê kurd û ereb ke wayîrê bingeyêkê tarîxî yê” dabi. Serekeşîrê ereban ê Til Koçerî derheqê mesajê Abdullah Ocalanî Ajansê ANHA rê qisey kerd.
‘Bi fikranê Ocalanî ma eşkenê Sûrîyeyêka demokratîike awan bikerê’
Şêxê eşîrê El Hedîsîye Xelid Himêî El Riheyil, Abdullah Ocalanî sey “Sembolê aştî yê Rojhelatê Mîyanênî” pênase kerd û dîyar kerd ke herêmanê Vakur û Rojhelatê Sûrîye bi serran o goreyê projeyê birayîya şaran yenê rayberdene ke heme temsîlkarî pîya ciwîyenê. El Riheyilî vat: “Mesajo ke hetê Rayber Abdullah Ocalanî ra ameyo erşawitene, dewamê nê projeyê demokratîkî yo.”
El Riheyilî bale ant fedakarîya HSD’yî ser o û vat: “Bi hezaran şehîdî dayê ke heme temsîlkaran û yewîya herra Sûrîye bipawê. Bi nê amancî ma eşkenê Sûrîyeyêka demokratîke û nemerkezî awan bikerê ke heme temsîlkarê şaranê Sûrîye verar bikerê.”
Şêxê eşîra Me’amra, Ehmed Hemûd El Ehmed zî da zanayene ke mesajê Abdullah Ocalanî ewnîyayîşêko sîyasî yê hîra seba çareserkerdişê krîzanê herême û xurtkerdişê waûbirayîya şaran pêşkêş keno. El Ehmed dîyar kerd eşîr û qebîleyê erebî seba rizgarkerdişê Vakur û Rojhelarê Sûrîye şehîdî dayê û ê heta ke welatêko demokratîk bêro destfînayene, do girêdayeyê gonîya gedeyanê xo bibê. El Ehmed dewamê qiseykerdişê xo de vat ke seke Abdulah Ocalan zî mesajê xo de vato, seba Sûrîyeya tewr başe sîstemêko nemerkezî yo. El Ehmed qiseykerdişê xo wina qedêna: “Aştîya ke Rayber Abdullah Ocalam vengdayîşê ci keno, aştîya wêrekan a û fikrê ey ê çareserî erjayeyê bawerî û piştgirî yê.”
