Xoverdayîşê Gezîyî êdî tarîxê Tirkîya cayêko avzel gêno û ser nê xoverdayîşî 12 serrî vîyartî. 31ê Gulana 2013î de verba zîhnîyetê talankerî de, xoverdayîşêk destpê kerd û dima zî no xoverdayîş pêroyîya welatî ra vila bî û bî îradeya bi milyonan.
Ewro, serrgêra xoverdayîşê Gezîyî ya. Xoverdayîşê Gezîyî êdî tarîxê Tirkîya cayêko avzel gêno û ser nê xoverdayîşî 12 serrî vîyartî. 31ê Gulana 2013î de Parka Gezîyî ya Taksîmî de ame waştiş ke daran çin bikerî la verba nê zîhnîyetê talankerî de, xoverdayîşêk destpê kerd û dima zî no xoverdayîş pêroyîya welatî ra vila bî.
Tena seba dorûverî nêbî
Çalakîyanê Gezîyî tena çarçiweya hassasîyetê dorûverî de nêmend, nê çalakîyan vera otorîteyî bîyê sey nefesêkî, çimkî Tirkîya de Hukmatê AKP’î heme waran de otorîteyê xo awankerdbî û destûr nêdaynî ke kesêk xo îfade biko, kom bibo. Hetta zîhnîyetê AKP’î êdî mudaxaleyê tarzê cuyeye welatijan zî kerdêne.
Pêşengîya çalakîyan ciwanî kerdî
Çalakîyan ra pêşengî ciwanan û heme dorûverî ra kesî kerdî. Hema zî xoverdayîşê Gezîyî bi vatişanê xo yê sîyasî û komelkî hafizayî welatijan de cayê xo gêno. Çalakîyan de yew hetî ra resmê Ataturkî abînî yew hetî ra zî resmê Rayberê Şarê Kurdî Abdullah Ocalanî abînî. No zî nîşan danî ke Gezî çalakîyêk nêbî sey serewedartişêk bî. Tirkîya de êdî şar vera zîhnîyetê otorîtebîyayîş û yewperestî de bêveng nêmaneno.
Şehîdanê Xoverdayîşê Gezîyî
Çi heyfo ke nê çalakîyan de ciwanan Ethem Sarisuluk, Alî Îsmaîl Korkmaz, Berkîn Elvan, Mehmet Ayvalitaş, Abdullah Comert, Ahmet Atakan, Medenî Yildirim (Licê de çalakîya vera viraştişê kalekolî de), Hasan Ferît Gedîk (vera çalakîya tiryakî de) ameyî qetilkerdiş, ciwanî ke ameyî qetilkerdiş elewî bîyê. Qetilan ra hesabê nê ciwananî nêameyî persayîş.
Hemsereka DEM Partî Tulay Hatimogullari zî seba serrgêra 12ine ya Xoverdayîşê Gezîyî, ser hesabê xo yê X’î mesajêk pare kerd û mesaj de wina ame vatiş: “Xoverdayîşê Gezîyî, 12 serrî yo. Gezî îradeya bi milyonan bî, Gezî vengê wertexî yê wicdanê nê welatî bî. Gezî ma bî, ma heme Gezî bîyê.”
