“Konferansê Yewrêzî û Yewnêzdîbîyayîşê Kurdî yê Kurdistanê Rojawanî”, do siba şaristanê Qamişlo de bêro viraştiş. Rojawan, Bakûr, Kurdistanê Başûrî û zaf herêmanê Sûrîye ra zafêr 400 kesî beşdarê konferansî bibî. Hûmarêk zêde ya sazîyanê çapemenî zî do bişopnê.
Konferansê Kurdê Kurdistanê Rojawanî ke bi serran a ke nîqaşê ci ameynî kerdiş, êdî pê yeno. Konferansê bi nameye “Konferansê Yewrêzî û Yewnêzdîbîyayîşê Kurdî yê Kurdistanê Rojawanî” do siba (26ê Nîsana 2025) Parka Azadî ya Şaristanê Qamişlo yê Kurdistanê Rojawanî de bêro viraştiş.
Goreyê agahîyê komîteya hadrekar, do temsîlkarê pêroyîya partîyanê kurd, rêxistinê cinî û ciwanan, kesayet, roşnvîr, hunermend û dîndarê Kurdistanê Rojawanî ra, kesayetê kurd ê şaristanê Şam, Heleb, Hema, Bab û Ezazî ra beşdarî konferansî bibê.
Kurdistanê Bakûrî heyetê DEM Partî, Kurdistanê Başûrî ra temsîlkarê partî û rêxistinan zî do konferansî de hedre bibê.
Her wina do Kurdistanê Rojhilatî, Başûr û teberê welatî ra zî mesajê partî û rêxistinê kurd bêrê wendiş. Beşo yewin rojnemageran ra akerde yo. Konferans do saet: 10.00 de bi xêrameyîşê meymanan û weçînayîşê diwanî destpê biko. Dima do qisekerdişê akerdişî hetê Fermandarê Pêroyî yê QSD’î Mazlum Ebdî ra bêro kerdiş.
Dimayê qisekerdişê akerdişî yê meymanî ser babete erjnayîş û erjnayîşê xo bîyarê ziwan. Her wina mesajê ke seba konferansî ameyî erşawitiş, bêrê wendiş.
Seba konferansî heme sazîyê çapemenî yê Kurdistanî û xeribî ameyî dawetkerdiş, goreyê komîteya hedrekar, do ser nameyê zêdeyêr 60 sazîyê çapemenîye dorûverê 200 rojnameger konferansî taqîp bikerî.
