Şingal qezaya Sîba Şêx Xidirî de komgorêko newe ame tesbîtkerdene. Gorî de 3ê tebaxe 2014î hêrîşanê DAÎŞ’î ra nat vindîbîyaye Sîba Şêx Xidirî ra karta nasnameyê Seydo Ebas Çûkoyî ameye dîyene.
Goreyê ROJNEWSî herême mabênê Sîba Şêx Xidir û qezaya Tilizêrî de şaro ke keye virazenê, wexto ke kepçe xebitnenê por, mendeyê însanan dîyî.
Nasnameyê Seydo Ebas Çûkoyî tesbît bî
Datîzayê Seydo Ebas Çûkoyî Sîbok Îsmaîl Çûkoyî merkezê polîsan de dîyar kerd ke karta ke ameya dîyene yê datîzayê ey a. Çûko vat: “Dezgehanê eleqedaran rê ma muracaat kerd, roja şemeyî tetqîqat do bêro kerdene.”
“Komgor teqez o”
Sazgehê Petrichorî ra Xeyrî Elî Îbrahîm ke komgoran ser o xebitîyeno vat herême de mendeyê di kesan ameyî dîyene: “Tîya komgorêk est o no teqez bîyo. Proseso qanûnî do bêro ramitene û xebatî do dewam bikerê.”
Vengdayîş seba komgoran
Keyeyî û sazgehê sîvîlî hukmatê Îraqî ra waşt ke bilezabez ganî ekîbê pisporî komgorê yê Şingalî akerê û tesbîtê nasnameyan bikerê.
Jenosîdê 3ê tebaxe 2014î
Çeteyê DAÎŞ’yî 3ê tebaxe 2014î de Şingal rê hêrîşê jenosîdî kerdbî. Goreyê Ofîsê Esîranê Êzîdîyan ê Xelaskerdeyan, 5 hezar ra zêdeyêr êzîdîyî qir bîyî, 2 hezar 745 domanî sêwî mendî. Heta ewro 100 ra zafêr komgorî tesbît bîyî. Bi hezaran cinî û domanî zî esîr bîyî. Înan ra 3 hezar 500 ra zêdeyêr xelas bîyî.
