Fermandarê QSD’yî Sîpan Hemoyî vat ke paştî danê eşkerayîya Meclîsê Şarî yê Taxanê Şêxmeqsûd û Eşrefîye û dîyar kerd ke hetkarîya ke destê inan ra yena do bikerê.
Fermandarê QSD’yî Sîpan Hemoyî derheqê hêrişê vera taxanê Şêxmeqsûd û Eşrefîye û xoverdayîşo ke vera ci yeno dayene de eşkerayîya bi dîmen pare kerd.
Sîpan Hemoyî bale ante ser ke hêrişê vera taxanê Şêxmeqsûd û Eşrefiyê 6ê çeleyî ra nata dewam kenê û wina va: ”Nê wird taxî xora tim raştê hêrişan yenê la narey hêrişê zaf wehşî yenê kerdene.” Hemoyî vat ke dinya nê hêrişan nêvînayîşî ra yena û na bêvengîye şermezar kerd.
Hemoyî vist vîrî ke xoverdayîşê Şêxmeqsûd û Eşrefiyê sey tradîsyonêkî yo wina domna: ”Xora gama ke qala nê wird taxan bena, cade xoverdayîş yeno vîrî. Ma pê bawer ê ke şarê nê wird taxan bi xoverdayîşê xo do plananê dişmenî betal bikerî û semedê azadîya xo û azadîya şarê kurdî serkewtiş bifînê dest.”
Fermandar Sîpan Hemoyî vist vîrî ke QSD’yî çarçewaya pêkerdişê 1ê nîsane ya 2025î de hêzê xo wird taxan ra vetî û vat: ”Meclîsê Şarî û Hêzê Asayîşê Zereyî asayîşê taxan anê ca.”
Sîpan Hemoyî vat ke ê paştî danê eşkerayîya Meclîsê Şarî ke ewro ameye dayene û wina va: ”Hetkarîya ke destê ma ra yena ma do bikerê. Qet heqê çewî çîn o ke şarê nê wird taxan erdê ci ra bikero. Şar do wayîrê taxanê xo bivejîyo. Ez pêro şervananê ke cephe de xover danê, tewirê bi rumetî yê şarê taxanê Şêxmeqsûd û Eşrefîye selam kena. No xoverdayîş do miheqeq ser bikewo.”
