Endama Konseya Serekîya Pêroyî ya KCK’yî Sozdar Avesta bale ant hêrişanê vera Vakur û Rojhelatê Sûrîye ser o û dîyar kerd ke nê hêrişan reyde Tirkîya caardişê Peymana 10ê Adare asteng kena.
Endama Konseya Serekîya Pêroyî ya KCK’yî Sozdar Avesta ke programêkê taybet ê Stêrk TV’yî de qisey kerd, bale ant hêrişanê vera Vakur û Rojhelatê Sûrîye ser o ke bi taybetî taxanê Şêxmeqsûd û Eşrefîye hedef genê û dîyar kerd ke nê hêrişî plankerde yê û amancê înan sîyasî yo.
Sozdar Avesta wina vat: “Nê hêrişî meseleya emnîyetê herême nîyê, rasterast mudaxeleyê prosesê aştî yê Tirkîya û vakurê Kurdîstanî hedef gênê. Wexto ke raya pêroyî de qiseyê “wayûbiratîye” bena, saha de qirkerdişî virazîyenê.”
Avesta îfade kerd ke înan goreyê vengdayîşê “Aştî û Komelê Demokratîkî” ke Rayberê Şarê Kurdî Abdullah Ocalanî 27ê sibata 2025î de kerd, hereket kerdo la hukmat bi qiseyê “Tirkîyaya Bêterore, Herêma Bêterore” wazeno prosesî bero bingeyê têslîmîyetî ser o. Avesta îfade kerd ke Peymana 10ê Adare de caardişê madeyan ser o çîyêk nêyeno kerdene, tena zordayîşê çekverdayîşî yeno kerdene.
‘Tasfîyekerdişê hêzanê xoverdayîşî yê şaran bêpawitox verdano’
Avesta ard vîrî ke Vakur û Rojhelatê Sûrîye de hêzê xoverdayîşî ke kurd, ereb û şarê bînan pîya awan kerdê, heme herême vera DAÎŞ’î pawitê û îfade kerd ke tasfîyekerdişê nê hêzan şaran bêpawitox verdano. Avesta vat ke hêrişî yewîya ereb û kurdan hedef gênê, vengda şarê ereb û eşîretan ke vera nê planan bêveng memanê.
‘Hêrişê ke cinîyan hedef gênê dewamê zîhnîyetê DAÎŞ’î yo’
Sozdar Avesta vat ke hêrişê hovaneyî ke cinîyan hedef gênê dewamê zîhnîyetê DAÎŞ’î yo û amancê înan o yo ke têkoşînê cinîya azade bitersnê. Avesta bale ant xoverdayîşê cinîyan ser o û vat ke do serkewte bibo û îfade kerd ke xoverdayîş hetê cinîyan ra yeno xurtkerdene.
‘Şertê Rayber Apoyî ganî lez bêrê caardene’
Avesta dîyar kerd ke mîmarê prosesê aştî Rayberê Şarê Kurdî Abdullah Ocalan o û vat ke dewamkerdişê şertanê tecrîdî yê Rayberê Şarê Kurdî Abdullah Ocalan prosesî dano hêdîkerdene. Avesta îfade kerd ke seba çareserîyêka raşte ganî şertê Rayberê Şarê Kurdî Abdullah Ocalan lez bêrê raştkerdene, heqê demokratîk û huqûqî şarê kurdan bêrê naskerdene û gamê samîmî û qanûnî bêrê eştene, îqaz kerd ke eke wina nêbo bêbawerî do xorînêr biba.
