Komeleya Cigêrayîşanê Kulturî, Tarîxî û Edebîyatê Fekî “SOZDER” bi wesîleya 15ê Gulane Roşanê Ziwanê Kurdkî, xeylê şaristanan û qezayanê Kurdistanî û Tirkîya de çalakîyê balkêşî organîze kerdî.
SOZDER, çarçeweya pîrozkerdişî de, pankart û vilavokî bi serrûpelê “Statuyê Kurdkî Perwerdeyî bi Kurdkî” û vatişê bêmerg Celadet Alî Bedirxanî, “Ya bi Kurdkî Qisey Bikerê ya zî Vaje Ma Kurd Nîyê, 15ê Gulane Roşan Ziwanê Kurdkî Pîroz Bo!” hadre kerdî.
Nê pankart û vilavokî hetê rayver û endamê SOZDER’î ra merkezê Mêrdînî û qezayanê aye yê Qoser, Dêrik, Şemrex, Nisêbîn û her wina şaristananê Batman, Riha, Edene û Stenbolî de ameyî vilakerdiş. Vilavokî bi taybetî sûke, bazar û esnafan de ameyî parekerdiş ke hişmendîya ziwanî mîyanê komelî de bêra zêdekerdiş û ziwanê kurdkî zêdetir bêro rojev.
Vengdayîşê Hemserekê SOZDER’î
Hemserekê SOZDER’î û nuştox Eyup Guven qiseykerdişê xo de bal kişte rewşa ziwanê kurdkî ser û girîngîya pawitişê aye ard ziwan û wina va: “Ziwanê ma yê dayîke, bi taybetî zaravayê kurmancî û zazakî, Tirkîya de binê xetereyêko pîl der ê. Celadet Alî Bedirxanî înan rê bi bingeh: “Ya bi Kurdkî Qisey Bikerê ya zî Vaje Ma Kurd Nîyê!” wa heme kurdan ke ziwanê xo her qada cuye de bişuxulnê û bipawê. SOZDER roja awankerdişê xo ra nata xebatanê xo bi hawayêkê rêkûpêkî domnena û înan sey rayberî raporêk hadre kerdo ke hem endamê komeleye hem zî raya umûmî nê xebatan ra agahdar bibê û na yew şefafîye û dilsozîya SOZDERî ya seba doza ziwanî nîşan dana. Ma do xebatanê xo yê ziwanî her warî de û mîyanê şarî de bi şarî ra bimeşnê. Bi na xebata ma ya em veng dana raya umûmî ke teqez ma bi ziwanê xo bidê û bigîrê. Bila ziwanê ma bibo ziwanê bazarî, ziwanê dan û stendişî û ziwanê sîyasetî. Bi kilmî ziwanê cuye.”
Xebatê bêmîyan seba ziwanê kurdkî
Eyup Guven destnîşan kerd ke SOZDER’î îlan kerdî ke nê çalakîyî tena çarçeweya Roşanê Ziwanê Kurdkî de nîyê, la ê do her wext û her şertî de seba pawitiş û averberdişê ziwanê Kurdkî xebatanê xo bidomnê û wina domna: “Ma do ziwanê kurdkî bigîrê mîyanê heme beşê komelî, çimkî ziwan nasnameyê ma yo û pawitişê aye erka ma heme ya. Çalakîyê ke hetê endamê SOZDER’î ra bi coşêko pîl mîyanê şarî de yenê meşnayene û vengdayîşê înan ê seba wayîrvejyayîşê ziwanê kurdkî, bi hawayêko hîra veng dana. Nê çalakîyî ke armancê înan berzkerdişê hişyarîya serê girîngîya ziwanê kurdkî û teşwîqkerdişê bikaranîşê aye yo, hetê kesê ke ziwanê kurdkî ra hez kenê ra bi hawayêko erênî yenê pêşwazîkerdiş û piştgirî danê nê hewldanê înan.”
