Muzîkjen Mehdî Ahmadpourîan berhemêko enstrumental bi nameyê “Pexşan” amade kerd. No berhemo enstrumental pexşan Ezîzî û Werîşe Muradî rê ameye dîyarîkerdene.
Muzîkjen Mehdî Ahmadpourîan ê Rojhelatê Kurdîstanî ra seba averberdişê muzîkê Kurdkî xebatanê xo domneno. Mehdî Ahmadpourîan meqamêko bi nameyê “Pexşan” ê enstrumantal amade kerd. Berhemo ke dîyarî girewteyanê sîyasî yê kurd Pexşan Ezîzî û Werîşe Muradî ameyo kerdene, nameyê Kom Muzîkî ser o ame weşanayene. Berhem heme platformanê medyaya dîjîtalê ya Kom Muzîkî ser o ame vilakerdene.
Kom Muzîkî bi nê metnî berhemî vila kerd:
“Seba kesanê ke zîncîrê koletî şiknayê!
Seba kesanê ke tarîxî ra vîyartê û azadîye newe ra manadare kerda!
Zereyê her şorişêkî de demê winasînî est ê ke qonaxê mabênê qedînayîş û azadîye de roşnî kenê. Demê winasînî ke cinî tena sey beşdarêk nê, sey rayberan xerîteya ameyoxî awan kenê.
No berhem seba rêzgirewtişê ê cinîyan ke felsefeyê ‘Cinî, cuye, azadîye’ ke tena vatişan de nê, cuye û têkoşînê xo de manadar kenê, ameyo afernayene.
Pexşan Ezîzî û Werîşe Muradî tenganeyê zindanî de hemverê dêsanê ke seba şiknayîşê îradeyê înan ameyê awankerdene, vinderetê. No dewamê azê ê cinîyan o ke kuçeyê Kurdîstanî nosyonê azadîye bi destanê xo afernayo.
Cinîyî ke mîyanê zilmî de komelêko newe awan kerd; tarîx de sey objeyêk nê sey kerdoxê rizgarî, rayberê şorişî, mîmarê ameyoxî.
‘Cinî, cuye, azadî’ hirê çekuyan ra vete, felsefeyêk a ke xoverdayîşê girewteyanê azadîyê, şerê Kobanî, xoverdayîşê Şengalî ra dest pêkeno û pawitişê nasnameyê cinîyan yê hemverê hêzanê îşxalker û serdestan de manayê xo vîneno. No felsefe zerrîya ramanêko winasîn ra vejîya ke azadîye rizgarîya cinîyan de dî. Cinîyî ke qurbanê tarîxî nîyê, eksê ci nê hêzê bedilîyayîş û bedilnayîşî û awankerdoxê komelêko azad ê. Cinîyê ke êdî paweyê rizgarîye nêvindenê, rizgarîye bi destanê xo awan kenê.
Pexşan û Werîşe di cinîyî mîyanê nê felsefeyî ra yê ke hemverê makîneya zilmî ya ke hewl da ke înan bêveng bikerê, sere wedarna.
Înan mektubanê xo de rastîyêk ser o wina nuşt ke rejîmê zordarî her tim tira tersenê:
‘Yan ganî merdim nêciwîyo, yan zî ganî manadar û berz bicîwîyo.’
Pexşan, Werîşe û heme cinîyî ke rayîrê azadîye ser o rayra şonê, tena nîyê. Heme cinîyî ke xover danê, heme cinîyî ke rastîye qîrenê, heme cinîyî ke zincîran kenê kulm, hemrayê înan ê.
No berhem seba şima yo, seba cinîyanê têkoşer ê ke tarîxo berovajîkerdene red kenê û tarîxêk newe ra nusenê!
Cinî Cuye Azadîye!”
