Wekîla DEM Partî Sumeyye Boz vat ke 8ê adare de seba komelkîkerdişê haştîye ê do bi şîarê ‘Jin, Jiyan, Azadî’ meydanan de bibê.
Wekîla DEM Partî Sumeyye Boz bi wesîleya 8ê Adare ajansê ANF’yî rê qisey kerd.
Sumeyye bale ante vengdayîşê Rayberê Şarê Kurd Abdullah Ocalanî ser û pare kerd ke Ocalanî bi desan serran o cigêrayîşê zemînê huqûqi û haştîye keno. Sumeyye vat: “No vengdayîş vengdayîşêko newe nîyo la çarçewa ci newe asena. Aqlê înkarî yê dewlete bi rayîrê têkoşînê ma resayo noqtayêke û metodê têkoşînî vurîyayî.
Her kes demokratîkbîyayîşê komelî sey hewcedarîye vîneno û ganî her kes seba ney erkê xo bîyaro ca. Muxalefetî bi wayîrvejîyayîşê vengdayîşî erkê xo yo verên ard ca. Ganî hinî îqtîdar erkê xo bikero. Erdoganî vato ke ê derbazê safhayêka newîye bîyê la hema seba haştîye îqtîdarî gamêke nêeşte.”
Sumeyye vist vîrî ke awankerdişê haştîye de rolê cinîyan serkêşî ya û vat: “Kesayetê azadî eşkenê komelê azadî biafernê û cinîyê azadî sey serkêşanê nê komelî eşkenê komelbîyayîşî hîna xurt bikerê. Têkoşînê azadîya cinîyan dînamîkanê komelî yê eslîyan ra yo.
Nê prosesî de cinîyî hê 8ê Adare pêşwazî kenê. Cinîyî her wextî ra zafêr refanê têkoşînî yê vernîyan de yê û awankerdişê haştîye de ganî cinîyî bi rolê xo têbigêrê. Seba komelkîkerdişê haştîye ma do bi şîarê ‘Jin, Jiyan, Azadî’ 8ê Adare de meydanan de bibê.”
