Suzan Îşbîlen kiştişê Gulîstan de balê ante polîtakaya şerê taybetî ser o û wina vat: “Kiştişê Gulîstan de gişta merdimanê dewlete est a.”
Dêrsim de 6 serrî verê cû wendekara Unîversîteya Munzurî Gulîstan Doku amebî vîndîkerdene. Badê xeylê wextî 13ê nîsane de çarçewaya cipersîyayîşêko newe de 13 kesî ameyê destbendkerdene. 6 serrî keyeyê Gulîstan û sazgehê cinîyan têkoşînêk danê. Têkoşînê 6 serrî ke keyeyê Gulîstan û cinîyî danê, nika netîce gêno. Seba babeta Gulîstan Doku sazgehê cinîyan a Komela Rosa ra Suzan Îşbîlen ajansê ma rê qisey kerd.
‘Lajê walî ma tehdit kerd, zor da ma’
Suzan Îşbîlen ard vîr ke Gulîstan Doku ra 6 serrî yo xebere nêyena girewtiş û wina vat: “Kes nêzano Gulîstan merda, vindî bîya, se bîya. 6 serrî yo ke keyeyê Gulîstan aqûbetê aye perseno. Ma komela cinîyan zî aqûbetê aye persenê. Heta ewro zî ma nêverda aqûbetê Gulîstan vîr ra şêro. Tîya ra 3-4 aşmî verê cû waya Gulîstan vat, ‘Ê ke kiştişê Gulîstan de gişta înan est a, înan ra 2 kesan xo resna ma û vat, kiştişê Gulîstan de gişta kamî est a ma zanê.’
Ma zi verde bî, la lajê walî ma tehdit kerd û zor da ma. Lajê walîyê Dêrsimî Gulîstan kişta. Embazanê ey ra yew pawitoxê walî yo, 2 kesî zî yê ke ewnîyenê kamerayanê şaristanî ra. Nê sebebî ra Avûkatî kewtê dimayê ci û ewnîyayê ke nê îdiayî rast ê. Yanî yeno zanayene ke heme merdimê dewlet ê. Aye ra dewlete kewta mîyanê dewa û nêverda heqîqet vejîyo meydan la heqîqet nimite nêmaneno.”
‘Walî waşt serê dewa bigîro’
Suzan Îşbîlen qiseykerdişê wina domna: “Walîyê ê wextî yê Dêrsimî, wezaretan de heme cayanê dewlete de qewetê ey est bi û waşt serê dewa bigîro.
Hem keyeyê Gulîstan û komela cinîyan hem zî avûkatî fek na mesela ra vera nêdanê û ma do heta peynî na dewa berê.
Kamî Gulîstan kişta, wa cayê aye vajê wa şorê goristanê aye bivînê. Werrekna Gulîstan nêmerdêne, ma aye ganî bîdîyêne. La Gulîstan ameye kiştiş. Qaso ke yeno vatene zereyê ereba de hêrişê aye kerdo û aye berda nêweşxane uca de merda. Dima ra qeydê kamera yê nêweşxaneyê zî pak kerdê, seke Gulîstan nêberda nêweşxane. O wext ra pey Gulîstan berda ça kes nêzano. Ganî tîya ra tepîya her çî vejîyo meydan.”
‘Walî û polîsan her çî nimito’
Suzan Îşbîlen qiseykerdişê xo de dîyar kerd ke, Lajê walî nê çî ardê sereyê Gulîstan û polîsan na mesela zanayene la nimita, ganî nê kesî gure ra bêrê eştiş û wina vat: “Karê înan şarî pawitiş o la walî û polîsan her çî nimito, lajê walî pawito. Na mesela de ganî ne walî ra ne zî lajê ey ne zî kesê ke nêzdîyê lajê ey ê û ê yê ke gîşta înan nê karan de est a înan rê nêmano. No çî ame Rojîn Kabaîş ser. Rojîn zî seke yeno zanayîş kişîyaya la kamî kişta kes nêzano. Ganî faîlê her diyan zî vejîyê meydan û cezaya girane seba înan bêra dayene.”
‘Kurdîstan de cinî bi destê merdimanê dewlete yenê kiştiş’
Suzan Îşbîlen bale ante kiştişê cinîyan ser o û vat: “Kurdîstan de zafê cinî bi destê merdimanê dewlete yenê kiştiş. Ma na mesela ra vanê şerê taybet. Kurdîstan de xora qimet nêdanê cinîyan, wexto ke cinîyê kurdî bê hina zêde qîmet nêdanê înan. Cinîyê kurdî ganî hişyar bibê û xo rêxistin bikerê, nê polîtîkayan veng vejê. Camêrdî ganî camerdîya ke sîstemî daya ci, xo tira bixelesno. Dewlete zî huqûq zî destek dano camêrdan. Cinî ganî yew bibê û seba nê sîstemî têkoşîn bidê”
