Efrîn de grûbê çeteyanê ke dewleta tirkan rê girêdayê yê, dest danê serê zeytûnanê citekaran û malê înan talan kenê.
Rêxistina Heqanê Însanan a Efrînî belge kerd ke rojanê peyênan de hetê bajar û dewanê Efrînî 900 daranê zeytûnan yê meyweyî ra zêdeyêr ameyî destserronayene. No hetê çeteyanê grûbanê çeteyan ra ke berpirsyarê “ekonomî” yê, yeno kerdene. Nê çeteyî mabênê 100 û 300 kesan anê herême û nê grûban reyde zeytûnan destserronanê û benê.
Zorî û talankerdiş
Şahîdan vat ke çeteyî xo sey “Şorişgerê ke Surîye azad kenê” bi name kenê û îdîa kenê ke “Citkarî kurdan rê heqê îtîrazî çin o.” Rêxistine îfade kerd ke “Komîteya Ekonomî” citkaran ra belgeyê resmî seba rezan wazena, eke nê belgeyî nêbê komîte do rezan bigîro.
Rêxistina ke îfade kerd talanê malê şarî binê sîya îşxalî û îdareyê dewleta tirkan de yeno kerdene, vat dewleta îşxalkere ya tirkan nê talanî ra berpirsyar a û na çalakîye sey zorî ra erjnenê û vurnayîşê strukturê demografîkî yo. Rêxistine vat: “Çîyê ke vera citkaran yenê kerdene pê zordayîşê çekan yenê kerdene û pê qeraranê ekonomî yê saxteyan yenê meşrukerdene.”
