Cagira Hemserekanê Pêroyî ya Berpirsîyara Rêxistinîye Elîf Bulute, derheqê Kongreya Adetî ya 5. ê DEM Partî ya ke 20ê îlonî de bêra viraştene de agahî dayî û vat: “Program û nîzamname do bêro vurnayene, seba nê zî badê amadekarîyan ronayişê komîsyonî temam bî û xebata xo da dest pêkerdene”
Partîya Têduştî û Demokrasî ya Şaran (DEM Partî), amadekarîyanê xo yê seba Kongreya Adetî ya 5. domnena. Komîsyonê merkezî ya kongre ya ke 20ê îlonî de Salona Sporî ya Ankara Arena de bêra kerdene, ame awankerdene. Komîsyonî dest bi amadekarîyanê verênan ê kongre kerd. Na çarçewa de, xebatê kongre yê verên qeza, şaristan û herêman de, dima zî bi konferansêko merkezî do bêro viraştene. Cagira Hemserekanê Pêroyî û Berpirsîyara Rêxistinî ya DEM Partî Elîf Bulut, derheqê detayanê kongre de Ajansê Mezopatam rê qisey kerd û dîyar kerd ke seba amadekarîyanê verênan kombîyayîşê cîya-cîyayî dest pêkerdê.
‘Ma amanc kenê ke aşma tebaxe de konferansî biqedîyê’
Elîf Bulut dîyar kerd ke înan dest bi amadekarîyê kongre ra ver kerdê û wina vat: “Verê her çî şaristanan de konferansê kongre ra ver bêrê kerdene. Nê konferansan de bi tewrbîyayîşêko tewr hîra do fikir û pêşnîyarê heme doruver û temsîlîyetan bêrê girewtene.
Nê qonaxî de, çarçewaya perspektîfêk dîyar de, ma plan kenê ke konferansê ke tede hêvîya vurnayîş û ravurîyayîşê girdî ke yenê waştene û bi pêşnîyaranê herêmî kongre şekil bigîro.
Elîf Bulut ard ziwan ke nê konferansî goreyê rewşe ra eşkenê taxe, qeza û şaristanan de zî bêrê kerdene û vat: “Badê konferansanê heremî amadekarîya ma seba komxebate est a. Komxebate de erjnayîşê heme netîceyanê konferansan do bêro kerdene.
Programî û nîzamname do bêro vurnayene
Yanî wexto ke ma şinê kongre sey amadekarîyêka verêne goreyê pêşnîyarê konferansî do kongre bêro kerdene. Ma plan kenê ke aşma tebaxe de heme amadekarîyê konferansê pêroyî temam bibê. Helbet wexto ke nê heme amadekarîyî yenê kerdene, eynî wext de amadekarîya konferansê kongreya cinîyan zî do pîya bêre rayraberdene.”
Elîf Bulute da zanayene ke kongre de do program û nîzamname bêro vurnayene. Meclîsê Partî (PM) yê dewrê neweyî bêro weçînayene û wina dewam kerd: “Na çarçewa de bi girewtişê pêşnîyaran ser Meclîsê partî bêro amadekerdene. Bi temamkerdişê amadekarîyanê teknîkî ma do 20ê îlone de kongreya xo virazê. Seba xebata vurnayîşê program û nîzamnameyî amadekarîya ma yê ronayîşê komîsyonêke est a. Seba amadekarîyan do binkomîsyonî bêrê ronayene goreyê perspektîfê hîrabîyayîşî xebata xo bikerê.”
