Torra koordînasyonî ke çarçewaya xebatan de ke Şaredarîya Şaristanê Girdî û 14 şaredarîyanê qezayan, Platformê Şîyar be û sazîyanê sivîlan vera girêdayîşê madeyan cayê tedavî bi fehmê “Dewa Rehabîlîtasyonî” bêro awankerdene ser xebatî ameyî destpêkerdene. No derheq de, kombîyayîşê çapemenî Çand Amed de ame organîzekerdene.
Kombîyayîşo ke derheqê falîyetanê ke seranserê bajarî de ramîyenê û xebatê ke yenê plankerdene ke dewreyê neweyî de bêrê bicaardene, ame kerdene, Hemşaredarî Serra Bucak, Dogan Hatun, hemserekê şaredarîyanê qezayan û temsîlkarê sazîyan beşdarê ci bîyî.
Şaredarîya Amedî ya Şaristanê Girdî, çarçewaya têkoşînê vera girêdayîşê madeyan de, hetêk ra xizmetê şêwirmendîye û perwerdeyî dewam kenê, heto bîn ra zî seba ke bajar de merkezêko hîra yê dermanî û rehabîlîtasyonî bêro awankerdene dest bi amadekarîyan kerd. Kombîyayiş Çand Amed
Hemşaredar Serra Bucake dîyar kerd ke pê qerarê meclîsî do merkezanê şêwirmendîye akerê û do heme şaristanî ra vila bikerê.
Şaredarîya Amedî ya Şaristanê Girdî, şaredarîyanê qezayan reyde torrêka koordînasyonê hemparî zî awan kerd û amanc kenê ke heme şaredarîyanê qezayan bi qerarê meclisî yê akerdişê merkezanê şêwirmendîye têkoşînî biresnê seranserê bajarî.
Encamê kombîyayîşî de Hemşaredara Şaristanê Girdî Serra Bucake serê nameyê kombîyayîşî na eşkerayîye kerde:
“Cêko ke ameyî wezîfe, ma têkoşînê vera girêdayîşê madeyan ke problemanê komelkî yê tewr muhîman ê bajarî ra yew o, sey yew warê xebate yo bingeyinî girewt xo dest.
Bi famê ke girêdayîşê madeyan tena problemêko weşîye nîyo ke kesî ser o tesîr keno, ma vera nê problemê zafqatî ke her roje hîna zaf keye, ciwan û gedeyan ser o tesîr keno, bi nêzdîbîyayîşêko pêroyî ke heqanê însanî, weşîya şarî û piştîpêdayîşê komelkî esas gêno, mudaxele kenê.
Na çarçewa de, Merkezê Şêwirmendîye û Perwerdeyî yê Girêdayîşê Madeyan de ke aşma çeleyê 2025î de awanîya Sumerparkî de dekewt xizmet, ma hemwelatîyanê ma yê ke têkoşînê vera girêdayîşî kenê xizmetê terapî, şêwirmendîya psîkolojîke û destekê psîkososyalî pêşkêş kenê.
Ma 140 hemwelatîyan rê destekê şexsî da
Merkezê ma roja ke abî, heta ewro 140 hemwelatîyan rê xizmetê terapîya şexsî û şêwirmendîye da. Tena çarçewaya merkezî de destek nêdîya şêwirmendan; merkezî her wext nêweşxane û prosesanê dermankerdişî de ke lazimê înan bî, înan rê reyde bî.
Çarçewaya xebatan de ke bi famê ke têkoşînê vera girêdayîşî tena pê destekêko domdar û piştîpêdayîşê komelkî mumkun o ramitî, ma falîyetanê pawitoxan û vernîgiran rê zî verênî daye.
Ma 1700 may û pîyan rê perwerde, 2520 gedeyan rê destekê atolye da
Çarçewaya xebatan de ke hetê merkezê ma ra ramîyenê, seba 1700 may û pî û pîlan perwerdeyê hişyarîya girêdayîşî ame dayene. Bi amancê ke keyeyî talûkeyanê girêdayîşî rew tesbît bikerê, gedeyanê xo reyde têkilîya biweşîye ronê û tepşêko pawitoxî aver berê, ma bernameyê hîrayî bicaardî.
Hetê bînî ra, çarçewaya xebatan de ke bi amancê ke gedeyî û ciwanî talûkeyê girêdayîşî ra dûrî bibê ramîyenê, ma 2520 gedeyan Atolyeyanê Parka Cuye reyde ardî têhet. Ma amanc kenê ke xebatê ke resayîşê gedeyan ê waranê sosyalan ê biemnîyetan zêde kenê, qabîlîyetanê cuye xurt kenê û talûkeyan ra înan pawenê, vila bikerê.
Seba merkezê dermanî û rehabîlîtasyonî amadekarîyan dest pêkerd
Goreyê xebatanê ke warî de ramîyenê û waştişanê ke keyeyan ra yenê, ma fam kenê ke bajarî de hewceyîyêka muhîme est a. Coka sey Şaredarîya Şaristanê Girdî ma seba ke bajarî de merkezêko hîra yê dermanî û rehabîlîtasyonî bêro awankerdene dest bi amadekarîyan kerd.
Tecrubeyê ekîbanê ma yê pisporan ke teqrîben serrêk û nêm o warî ra xebitîyenê û cewabê ke şêwirman û keyeyan ra yenê, hewceyîya merkezêkê wina bi hewayêko eşkera aseno.
Ma wazenê ke îfade bikerê ke merkezo ke ma plan kenê ke bica bîyarê, tena warêko dermankerdişî nîyo; do bi famê “dewa rehabîlîtasyonî” bêro dîzaynkerdene ke tede berhemardiş, cuya sosyale, destekê psîkolojîkî û reyna pêroyîya komelkî temîn bibo.
Şaredarîyanê qezayan reyde torra têkoşînê hemparî yena awankerdene
Sey Şaredarîya Amedî ya Şaristanê Girdî, ma bi amancê ke têkoşînê vera girêdayîşî seranserê bajarî de hîna bihêz û hîra bikerê, şaredarîyanê qezayan reyde torrêka koordînasyonê hemparî awan kerd.
Na çarçewa de, xebatê têkoşînê vera girêdayîşî heme qezayan de bi hemahengî do bêrê ramitene, parekerişê agahî û tecrubeyan do bêro xurtkerdene. Pê Merkezanê Şêwirmendîye û Perwerdeyî yê Girêdayîşê Madeyan ke do çarçewaya şaredarîyanê qezayan de bêrê akerdene, do vilakerdişê xizmetan û resayîşê hemwelatîyan ê destekî înan rê lazim o, cayanê ke tede yê, do bêro temînkerdene.
“Têkoşînê vera girêdayîşî berpirsîyarîya ma ya hempar a”
Têkoşînê vera girêdayîşê madeyan xebatêka hîra û hempare mecbûrî keno. Coka no têkoşîn, berpirsîyarîya hempare ya keyeyan, rêxistinanê komelê sîvîlî, dezgehanê weşîye û perwerdeyî, warê karî, îdareyanê herêmkî, dezgehanê komkî û heme beşanê komelî yo.
Sey şaredarîyanê DEM Partî, ma do bi qerardarî dewam bikerê ke seba ameyoxê gedeyan, ciwanan û keyeyan xebatanê têkoşînê vera girêdayîşî gird bikerê, piştîpêdayîşê komelkî xurt bikerê û gamanê neweyan bierzê.
Hewcedarîya ma bi şima est a
Bi na wesîle, ma xebatkaranê ke Merkezê Şêwirmendîye û Perwerdeyî yê Girêdayîşê Madeyan de wezîfe gênê, şaredarîyanê ma yê qezayan, dezgehanê ke destek danê û heme hemwelatîyan rê ke paştî danê têkoşînî, sipas kenê. Ma bawer kenê ke na seferberîya ke dest pêkerda do seba ameyoxê bajarî netîceyanê muhîman biafirna.
Ma bawer kenê ke serkewtişê nê heme xebatan de şima karkerê çapemenî yê erjîyayeyş zî do rolêko muhîm bigîrê; ma piştîdayîşanê şima yê warê berzkerdişê hişyarîya komelkî, vilakerdişê agahîya raşte û xurtkerdişê kulturê piştîpêdayîşî de muhîm vînenê.”
