Ahmet Temîz ke 31 serran tepişte mend û azad bî, vat: “Bi heme zordestan ma zîndanî kerdî warê xoverdayîşî.”
Ahmet Temîz ke 1994î de Amedî de ame tepîştene û hetê DGM’yî ra bi cezaya muebbedî ame mahkûmkerdene, 31 serran ra dima 18ê êlûle de azad bî. Azadîya ey bi bahaneyanê “talebê vejîyayîşê rêxistine nêkerd” û “suçê xo qebul nêkerd” ameybî taloqkerdene.
Temîzî ajansa ANF’î rê qisey kerd û vat: “Wexto ke qerarê azadîya mi resa mi heyecanê mi zêde bî. 31 serran ra dima resayîşê azadîya xo raşta zî zaf weş o. Labelê keyfweşîya tam nêmcet a çunke bi hezaran embazê ma hema zîndanan de yê. Rayber Apo azad nîyo.”
Temîzî derheqê zîndanan de vat: “Hêz û xoverdayîşê xo ma teber ra têkoşînê azadîye ra girewt, têkoşînê şarê xo ra. Heta ke şarê ma û têkoşînê ma est ê, seba ma nêeşkenê ne warî sînordar bikerê ne zî zordestî bikerê. Bi heme zordestîyan ma zîndanî kerdî warê xoverdayîşî.”
Temîzî îfade kerd ke zîndanan de zordestî û bêhuqûqî zaf est a û vat: “Zîndanan de sîstemêkê înfazî est o labelê pratîk de qet nêyeno caardene. Tepîşteyê nêweşan ra bigîrê heta rojnameyî her warî de sînorkerdiş û bêhuqûqî est ê.”
Temîz derheqê prosesê aştîye de îfade kerd: “Ma Rayber Apoyî ra bawer kenê. Rayber Apo nê prosesî de mîmaro bingeyin o û coka ganî warêko azad de prosesî îdare bikero. Ganî şertî bêrê afirnayene ke Rayber Apo azad bo.”
