Di mîtîngê ke HDP’yî pê ard de DAIŞ’î hêriş kerd û teqayîş de 4 kesî dinyaya xo bedelnayî û 2010 kesî zî birîndar bîy. Pêwa teqayîşî ser de 10 serrî derbaz bî cezaya lazim şikdaran rê nêamî birnayîş û derheqê ke edalet pê bêro de gamî nêameyî eştiş.
Partîya Demokratîke ya Şaran (HDP) 5ê hezîrana 2015ine de Meydanê Îstasyonî yê Amedî de mîtîngê “Merdimayîyê pîlî” pê ard û DAIŞ’î hemverê mîtîngî de hêrişê bombayî kerd. Netîceya teqîyayîşê di bombayan de Ramazan Yildiz, Nejanî Kurul, Şehmuz Kaçan, Civan Arslan û Alî Turkmen dinyaya xo bedelnayî û bi seyan kesî zî birîndar bîy.
goreyê xebera Jinnewsî derheqê teqîyayîşî de 2yîn dadgeha cezaya giran ya Sîncanê Anqarayî de dewa 25 roniştişî amî kerdiş û Orhan Gonder, Îsmaîl Korkmaz û Mustafa Kiliç her yewî rê 5 rey muebetê giran ame birnayîş. Dadgehe dewaya Îlhamî Balî visna û Burhan Gok zî berat kerd.
Pêwa îxbarî vernîya hêrişî nêamî padayîş
Orhan Gondero DAIŞîj ke hêriş kerd, pêwa ke vejîya werte kaçaxê leşkerîye yo, qeydê ey otele est o, emnîyetî tu çîyêk derheqê ey de nêkerdo. Pêwa ke keyeyê ey vato do hêrîş bikero, hêriş nêame astengkerdiş. Badê hêrişê şikdar Orhan Gonderî şino Dîlok û bi Îsmaîl Korkmaz, Mustafa Kiliç û Burhan Gok ke hêriş plan kerdibî dir yeno tepiştiş. Dewa bi sebebê asayîşî 2016ine de berdî Anqara.
Dosya dadgerî de ya
Roniştişê 2yîn dadgeha ceza giran ya Edlîyeyê Sîncanî de amî vînayîş de heyetê dadgehe derheqê şikdar Orhan Gonder, Mustafa Kiliç, Îsmaîl Korkmaz de ‘binpaykerdişê desturê bingehîn’ cezaya muebetê giran, ‘qetilkerdişê 4 kesî’ 4 caran muebeto giran, ‘teşebusê qetilkerdişê kesî’ zî 104 rey 17 serrî, ‘teşebusê qetilkerdişî’ 102 rey 14 serrî, ‘madeyê bi tehluke xo dir gêrnayê’ 13 serrî, 4 aşmî û cezaya pereyî birna. Derheqê şikdar Burhan Gokî de zî qerarê beratî da. Muracatê îstînafî ame redkerdiş û dosya Dadgerî pawena.
Ceza ameyî vistiş
Derheqê 14 polîsê ke meydanê mîtîngî de bi faliyetê kontrolî wezîfedar bî zî 14ine Dadgeha Cezaya Aslîye ya Amedî de dewa amî akerdiş. Dadgehe derheqê înan de hîrê aşmî ceza birna. La dima ra na ceza fînayî di aşmî û 15 rojan. Polîsî bi qusur nêameyî vînayîş. Derheqê dadgera 14ine dadgeha cezaya giran ya Amedî de Gulsum Akkoyun de bi sebebê demê cipersayîşî de ‘wezîfeyê xo nêbaş şuxilnaya’ Heyetê Dadgerî û Dozgeran (HSK) rê gerre ame kerdiş. La derheqê gerrekerdişî de tu averşîyayîş zî çin o.
