Mudirîyetê Pêroyî yê AVKAMED’î dimayê xebera ajansê ma qerar girewt ke Tesîsê Parzunkerdişê Awa Şuxulnaya ya Bîyolojîk o Averşîyaye ke Çemê Dîcleyî lêmin keno, bi hewayêko demkî bigîro û tesîsê ser o xebitîyeno.
Mudirîyetê Pêroyî yê Rayberîya Awe û Kanalîzasyonî yê Amedî (AVKAMED) yê Şaredarîya Amedî ya Şaristanê Girdî, derheqê Tesîsê Parzunkerdişê Awa Şuxulnaya ya Bîyolojîk o Averşîyaye de ke zerar dayêne Çemê Dîcleyî, eşkerayî daye. Eşkerayî vernîya tesîsî de ameye dayene. Eşkerayî bi kurmancî û tirkî ameye wendene.
Ajansê ma roja 21ê teşrîna peyêne de vetbi orte ke awa lêmine yanî gendawe herikîyena Çemê Dîcleyî. Nê semedî ra awa lêmine, Çemê Dîcleyî bijehr û lêmin keno. Xebera ma sero AVKAMED kewt mîyanê têgêrayîşî.
Mudirîyetê Yewîya Kanalîzasyonî Abdullah Kayhanî eşkerayî bi tirkî wende û eşkerayîyay bi kurmancî zî Midurê Şubeya AVKAMEd’î Şeref Kaplanî wende.
Seba çareserîya awa lêmine, tesîs bi demkî ame girewtene
Şeref Kaplanî dîyar kerd ke cehdê modernîzasyonî yê ke sîstemê pompakerdişî yê Tesîsê Parzunkerdişê Awa Şuxulnaya ya Bîyolojîk o Averşîyaye de yenê kerdene, serra 2003î ra yeno şuxulnayene û vat: “Seba ke pompayê ke est ê kehen benê, nêeşkenê pawitişê ewleyîya sîstemê domdar bikerê. No zî girewtişê tesîsî yo demkî mecbur keno. Tesîsê ma mabênê 25ê teşrîna peyêne û 15ê kanûne ya 2025î de do seba xebatanê dermankerdişî bi demkî bêro vindarnayene. No qerar bingeyê prensîbanê endezyarî û lazimtîyanê teknîkî ame girewtene ke vernîya rijîyayîşê potansîyel ê sîstemî, rijîyayîşo bêkontrol û zerarê cugehî yo demderg bigîro. Ganî no girewtiş sey garantîya ewleyîya cugehî ya demderg bêro vinayene.”
Do cehd bikerê ke vernîya lêminkerdişê Çemê Dîcleyê bigîrê
Şeref Kaplanî îfade kerd ke ê do bi girewtişo demkî yê tesîsî tesbîtê pakîya Çemê Dîcleyî ser o bikerê û wina vat: “Na nuqta de rijîyayîşê heme gendawe yê mîyanê Dîcleyî seba 15-20 rojan eşkeno lêminîya ke asena û stresê ekolojîk çem de bikero. Do xebatê dezenfektekerdişî bêrê kerdene. Ekosîstemê çemî eşkeno nê barî rê bi hewayêko demkî tehemul bikero. Na çarçewa de do xetereya rastî ya çemî ser o vejîya orte. Amancê ma o yo ke heta 15ê kanûne ma tesîsê xo bi sîstemêkê pompakerdişî yê bi ewleyî veradê Çemê Dîcleyî ser o. Ma do derheqê nê prosesî ke ma ser o qerar girewto û encamê ci bi hewayêko serûber raya pêroyî reyde pare bikerê. Ma do prensîbanê şefaftî ser o xebitîyenê û ma do cehd bikerê ke xetereyî nêbî.”
Xebera ma ya derheqê tesîsî de na ya: https://ajansawelat.com/ji-tesisa-avkamede-jehri-diherike-dicleye/
