CENTCOM’î eşkera kerd ke netîceyê kewtişê teyaraya înan a Îraqî de 4 leşkerê Amerîkayî cuya xo ra bîyê, 2 hebî zî vîndî yê.
Fermandarîya Merkezî ya Hêzanê Amerîkayî (CENTCOM) bi eşkerayîyêk dîyar kerd ke vizêr teyarayêka înan a KC –135 ya taybete seba tedarêkê sotemenî wextê operasyonêkê leşkerî yê rojavayê Îraqî de kewt la teyaraya dîyine bi selametî resaya teyaragehî.
CENTCOM’î derbarê babete de eşkerayîyêka bîne vila kerde. Goreyê fermandarîya CENTCOM’î 6 leşkerî teyara de bîyê ke kewte. Ame vatene ke nê leşkeran ra 4 hebî cuya xo ra bîyê û seba vînayîşê her di leşkeranê bînan zî cigêrayîş dewam keno.
Fermandarî da zanayene ke serebûte ser o cigêrayîş dayo destpêkerdene, goreyê fermandarî teyara netîceyê hêrişî de nêkewto war.
Îran: Ma teyara vist, ê ke tede bîyê ameyê kiştene
Verfekê Serfermandarîya Xatem El-Enbîya ya Hezanê Çekdar yê Îranî Îbrahîm Zulfîkar ewro eşkera kerd ke hetê hêzanê înan ra, teyarayê tedarêkê sotemenî yê Amerîkayî rojavayê Îraqî de bi sîstemê pawitişê hewayî ame pirodayene û kewt war.
Îbrahîm Zulfîkarî dîyar kerd ke netîceyê hêrişî de heme endamê ekîbê teyarayî de bîyê, ameyê kiştene.
