Temsîlkarê Taybet ê Amerîkayî yê Sûrîye û Serfsefîrê Anqara Tom Barrackî eşkera kerd ke ê nêwazenê sîstemê Rojava yo xoser û demokratîk mîyanê qebîle û eşîranê ereb de bêro bicakerdene.
Enstîtuya Milken a Eyaletê Kaliforniya ya Amerîkayî rewşa peyên a Sûrîye ser o Temsîlkarê Taybet ê Amerîkayî yê Sûrîye û Serfsefîrê Anqara Tom Barrackî reyde roportaj kerd. Roportajî de Tom Barrackî vat ma nêwazenê sîstemê Rojava yo Xoser Sûrîye de bandure bibo.
‘Ma nêwazenê kulturê Rojava tesîrê eşîranê ereban bikero’
Tom Barrackî roportajê Enstîtuya Milken a Eyaletê Kaliforniya de dîyar kerd ke problemo sereke o yo ke Rojava waşto modelê xo eşîr û netewanê bînan ser o ferz bikero ke wayîrê tarîx û kulturêko taybet ê bi hezaran serran ê. Tom Barrackî îfade kerd ke înan dorê eşîr û herêmanê winasînan de xêze anta ke hedîseyanê winasînan ra tesîr nêbî.
Barrack: Peymana Sykes-Picot nêyena bedilnayene
Tom Barrackî seba statuya xerîtaya Rojhelatê Mîyanên zî dîyar kerd ke ê nêwazenê Sykes-Picot bêra bedilnayene. Barrackî dîyar kerd ke mîyanê seserrî de welatanê rojavayî 92 reyî cehd kerdo ke herême de rejîmî bibedilnê la sernêkewtê.
‘Serdemê Trumpî sîstemê herêmî paweno’
Barrackî da zanayene ke stratejîyo newe yê Amerîkayî serdemê Trunpî de o yo ke “cehd keno ke herême sey xo bimana” û vernîya ferzkerdişanê teberî zî bigîro û herinda ney de îmkanê aborî bêrê awankerdene.
Barrackî cayêkê roportajî de zî dîyar keno ke serdemê xerîtayanê kehenan binkewto û ganî Rojhelatê Mîyanên nakokîyanê eşîrîyan ra vejîyo û verê xo bido teknolojîyo averşîyaye.
