Tornê Şêx Seîdî Bedrî Firat va ke problemê kurd bi ewnîyayişêko sîyasî bêro çareserkerdêne, komarêka seyyewbînan bêra awankerdene û wina va: “Tirkîya ganî na pêvajoye weş bikar bîyara, eke pêvajo weş nêard ca do hem seba Dewleta Tirk hem zî dewletê Rojhîlatê Mîyanênî tenganeyî bîyaro.”
28ê Kanûne de DEM Partî ra heyeto ke Pervîn Buldan û Sirri Sureyya Onderî ra yeno pê Îmraliyî de Rayberê PKK’î de pêvînayîş kerdbî. Derheqê pêvînayîşê bi Rayberê PKK’î de, dormeyê sîyasîyan de pêvînayîşan yeno kerdiş û pêvajo resa astêkî, nika heme çimê dinya û şarê Tirkîya Ocalan de yo, çimkî Rayberê PKK’î Abdullah Ocalan beyanetêko tarîxî do bido.
Pêvajoya neweyî ser o tornê Şêx Seîdî Bedrî Firat ajansê ma rê qise kerd.
Problem hema zî weş nêameyo famkerdêne
Tornê Şêx Seîdî Bedrî Firat va ke nê seserra ke Hereketa Şêx Seîdî destpê kerda, destpêka ra ewta, hetanî nika pergalo lêşîn verba şarê kurd polîtîkayê tewir bi tewir şuxulnayo û wina va: “Xoverdayişê Şêx Seîdî hetanî nika înkar kerdê, her tim rojeva Dewleta Tirke de Serehawanayişê Şêx Seîdî estbî. Doz û dewaya Şêx Seîdî, semedê xoverdayişî çi bî, hema zî Tirkîya de nêameyo şîrovekerdêne û bi raştî zî hema zî nêameyo famkerdêne. Ma zanenê ke Şêx Seîd verba pergalî serehawana, çimkî kurdan ameynî înkarkerdêne.
Şar benda goristanê Şêx Seîdî yo
Firat wina domna: “Verba polîtîkayê înkarî de Şêx Seîd nêrazîyayişê xo nîşan da. Roja ke hetanî vejîya û ame Pîranî, armancê Şêx Seîdî bi çek serehawanayiş nêbî la belê provokasyonî ser o, nêçare serehawana. Nika zî Tirkîya de her tim polîtîkayê provokasyonî verba şarî yeno şuxulnayêne. Çi heyfo ke hema zî goristanê Şêx Seîd û embazê ci hema zî nêdîyar ê. Şar hema zî benda cayê goristanê Şêx Seîdî yo.”
Hema zî bi hîle nêzd bena
Firat aşkera kerd ke yeno zanayiş ke problemê kurd nê seserra ke yanî awanbîyayişê Komara Tirkîya de estbî û hema zî est o û wina dewam kerd: “Tirkîya de na babete de gama ke pozîtîf nêameya eştiş, her tim bi xapinayiş û peygoşkerdiş ameyo nêzdbîyayîş. Ewro ma zanenê ke problemê kurdan ame warê Mîyanêneteweyî, Tirkîya hema zî bi hîle nêzdê nê problemî bena. Ma bendayê ke no problemî ra bi cidîyetî nêzdî bibê, eke problemê kurdan çareser nêbo do problemê Şêx Seîd û embazê ci zî çareser nêbeno.”
Çareserî waye û birayîya şaranî ra vîyarena
Firat bal ant ser pêvajoyêka domnenîye ra, nê 40 serrê ke şerêk Tirkîya de est o û netîceyê nê şerî de Tirkîya hetê ekonomî û sîyasî de krîzêko gird vejîyayê werte, warê Mîyanêneteweyî de heqê Tirkîya de sûcdarkerdişê girdî est ê, seserra diyine de problemê kurd çareser bikê.
Firat wina qedîna: “No warî de Tirkîya çi heyfo ke na pêvajo ra bi ziwanêko lêşîn nêzd bena. No ziwano lêşîn zî xo ra çareserî nêano, redî û înkarî ra ganî fek veradê, çareserî encax no warî de bêro. Seba çareserî ganî kurd zî sey neteweyêk no welat de cuya kenê wa bêrê şinasnayiş, Şêx Seîd zî bi no waştişî ser vejîya rayîrî. Problemê kurd bi ewnîyayişêko sîyasî bêro çareserkerdêne, komarêka seyyewbînan bêra awankerdêne. Tirkîya ganî na pêvajoye weş bikar bîyara, hêzê mîyanêneteweyî wazenê goreyê xo problemê kurd çareser bikerê û no zî do hem seba Dewleta Tirk hem zî dewletê Rojhîlatê Mîyanênî tenganeyî bîyaro. Çareserî waye û bîrayîya şarê Tirkîya ra vîyarena û eke wina nêbo çareserî zî nîna.”
