Serekê DYA’yî Donald Trump û Serekdewletê Rûsya Vladîmîr Putînî derheqê şerê Ûkrayna de do 15ê Tebaxe de Alaska de bêrê têhet.
Pêvînayîş, dima beyanatê Trumpî yê serê medyaya dîjîtale ra hetê Kremlînî ra zî ameya piştrastkerdiş. Verfekê Kremlînî da zanayîş ke seba nêzdîbîyayîşê Alaskayî yê welatê Rûsya ra cayê pêvînayîşî ‘yew tercîhêko weş o’.
Trump, beyanatê xo yê verê pêvînayîşî de dîyar kerd ke seba peynîya şerî beno ke mîyanê Rûsya û Ûkraynayî de ‘bedilnayîşê tay herreyan’ bêro kerdiş. Goreyê çimeyanê Koşka Sîpî, rayberîya DYA’yî hewl dana ke serekê Ewropa qanî bikerî ke serê yew têhetameyîşêko ke Rûsya temamê herêma Donbas û Krîmî destê xo de bigîro û vera nê yewî ra herêmanê Herson û Zaporîjya yê ke yew parçeyê înan ameyo îşxalkerdiş, vindero, bêrî yew ardiş.
Goreyê xebera Wall Street Journalî, Putînî pêşnîyazêko wina yew demêko kilm verî ra zî mabenkarê Trumpî yê taybetî Steve Wîtkoffî rê zî îzah kerdo. Labelê Serekdewletê Ûkraynayî Volodîmîr Zelenskî verê cû heme têhetameyîşê ke tawîzanê herreyan sey şert nîşan danî, red kerdîbî. Her wina eşkera nîyo ke welatê Ewropa û Kîev do na pêşnîyazî çend weş vîr ra vîyarnî.
Trumpî bala xo ant îhtîmalê têhetameyîşê heme hîrê hetan ser û va: “Serekê Ewropa waştişê aşîtî kenî, Serek Putîn waştişê aşîtî keno û Zelenskî zî waştişê aşîtî keno.” Labelê detayê pêvînayîşî nêameyî eşkerakerdiş ke nêno zanayîş ke Zelenskî zî do senî beşdarê pêvînayîşan bibo.
Hêjayî vîrakerdişî yo ke têkilîya Trump û Putînî ya rasterast aşma Sibate de serê qiseykerdîşêko têlefon de bîyîbî.
