Serekê Dewletanê Yewbîyayeyan ê Amerîka (DYA) Donald Trump reyna Îranî îqaz kerd û Îranî tehdît kerd. Trumpî vat eke Îran hêrişanê kiştişî yê vera çalakîkeran bidomno do Amerîka hetkarîya çalakîkeran bikera.
Îran û Rojhelatê Kurdîstanî de çalakîyê krîzê aborî ser o roja 28ê kanûna 2025î de dest pêkerd, pêroyê Îranî ra vila bîyê. Bi taybetî zî Rojhelatê Kurdîstanî de şaristanê Îlam û Kirmanşanî çalakîyan rê pêşengîye kenê. Roja 4ê çeleyê 2026î de hêzê Rejîmê Îranî nê her di şaristananê kurd çalakîkeran ser o guleyî rişnayê û her di şaristanan de 8 kurdî ameyê kiştene.
Şaranê Îranî vera tehdîtanê Xamaneyî reaksîyon mojna
Her ke şono çalakîyî benê gird. Serekê Dînî yê Îranî Xamaneyî zî derheqê babete de eşkerayî dayeç Eşkerayî de da zanayene ke Îran de bê îstîkrarî est a. Xamaneyî da zanayene ke dikandarî ney ra xesarî vînenê û ê heqdar ê ke înan îqaz bikerê û vat: “Nêbeno ke kes vera rejîmê vejîyo û çalakîyan bikero. Çalakîyî gird bibê do hêrişê înan bêro kerdene.
Trump: Ma Îranî baş şinasnenê
Çalakîyî ke Îran û Rojhelatê Kurdîstanî de yenê kerdene, qadê mîyanneteweyî ra nêzdî ra yeno taqîbkerdene. Seba ke hêzê rejîmê Îranî vera çalakîkeran hêriş benê û çalakîkeran kişenê reaksîyonê mîyanneteweyî zî her ke şono vêşî benê. Serekê Amerîkayî Donald Trumpî derheqê babete roja yewşeme teyareya Serekîya Amerîkayî de rojnamegeran rê qisey kerd û mesajê îqaz ê hişkî dayê rejîmê Îranî. Trumpî wina qisey kerd: “Ma Îranî baş şinasnenê û hedîseyanê ci nêzdî ra taqîb kenê. Eke ê dest bi kiştişê şarî bikerê, senî ke verê zî kerd, ez bawer a ê do hetê Amerîka ra derbeyêka girane biwerê.” Trumpî tehdîtê xo wina pênase kerd: “Ma bi çekanê xo amade yê.”
Trumpî çend rojî ra ver Tehranî îqaz kerdbî
Serekê Amerîkayî Donald Trumpî çend rojî ra ver zî hesabê xo yê tora komelkî Truth Sociale ser o eşkerayîyêka hişke vila kerdbî û tehdîtê mudaxaleyê Îranî kerdbi. Trumpî tehdîtî de zî vatbi ke Îran çalakîkeranê aştîwaz gulebaran bikera û înan bi hewayêko hovane bikişa ê do hetkarîya çalakîkeran bikerê.
Netenyahu: Min û Trump ma mabênê xo de munaqeşa kerd
Serekwezîrê Îsraîlî Benjamîn Netenyahu jî vizêr kombîyayîşê hukmatê Îsraîlî de Îranî îqaz kerdbi û vat ke ey û Trumpî rewşa Îranî mabênê xo de munaqeşa kerda.
Çalakîyî vila benê
Çalakîyî zafane riyê rewşa aborîye ra 28ê kanûne de Tehran de dest pêkerdê û demêko kilm de şaristananê Kirmanşan, Loristan, Îlam, Çarmehal û Bextyarî, Qûm, Xûzistan, Fars, Îsfehan, Hemedan û Meşhedî de vila bîyê. Çalakîyî xeylê şaristanan de dewam kenê û hêzê rejîmê Îranî hêrişê çalakîkeran kenê.
