Endama Têgêrayîşê Azadî ya Kurdîstanî Helîn Umît îfade kerd ke ABD û Îsraîlî hêrişê xo yê vera Rojhelatê Mîyanênî zêde kenê û vat: “Hêzo ke do herême de pêkewtişê şaran, hêrişanê netewedewletîye vindarno, tena Rayber Apo yo.”
Endama Têgêrayîşê Azadîya Kurdîstanî Helîne Umît Medya Haber TVyî de Programê Xususî de qisey kerd û Prosesê Haştîye û Komelê Demokratîkî, şerê Rojhelatê Mîyanênî û muhîmîya Newroza emserî ser o nirxnayîşî kerdî.
Umîte îfade kerd ke Rayber Apo û Têgêrayîşê Azadîye bi zahmetanê girdan proses resnayo qonaxêka muhîme û nika proses qonaxa dîyine ya amadekerdişî de yo. Vat ke proses nika gamê ke dewletê tirke do bierzo ser o pabeste mendo û no proses averşîyayîşanê konjunkturalan rê qurban nêbeno.
Umîte bale ante hêrişanê Îsraîl-Amerîka-Îranî ser û vat ke ê heta nê hêrişan vindarnê û şar do bi hêrişanê hîna girdan, heta jenosîdî reyde rî bi rî bimano. Vat ke Gazze bîyo model û nê hêrişkarîya sîstemî Rojhelatê Mîyanênî de heme şaran rê mesaj da.
Umîte nirxnayîşê xo de vat ke Rojhelatê Mîyanênî de hîrê hetî est ê: pawitoxîya statukoyî, hêzê ABD-Îsraîlî yê hêrişkarî û stratejîya entegrasyona demokratîke ya Rayber Apoyî. Vat ke tena stratejîya Rayber Apoyî do şaran azad bikero û pêkewtişanê netewedewletîyan vindarno.
Umîte Newroza na serrî ser o vat ke şarê kurdî her ca bi coş û heyecanî waran pirr kenê û waştişo bingeyin azadîya fîzîkî ya Rayber Apoyî yo. Umîte vat ke Rayber Apo Kurdîstan bi xo yo û azadîya fîzîkî ya ey statuyê Kurdîstanî yo, coka nika kurdî nê waştişê xo îfade kenê û nê waştişî do bêrê caardene.
Umîte peynî de îfade kerd ke 60 milyon kurdî yê dinamîkî est ê û eke Rayber Apo fîzîkî azad nêbo û nê dinamîzmî rê rayberî nêkero, no dinamîzm her hetî ra vila beno coka keso ke nê hêzî vindarno, kontrol bikero û rayîr nîşan bido tena Rayber Apo eşkeno bikero, keso bîn nêeşkeno.
