Polîsan Unîversîteya Dîcle de merasîmê mezûnîyetê wendekaranê beşê rojnamegerîye de pankarto ke fotografê Apê Mûsayî ser o bi, asteng kerd.
Wendekarê Beşê Rojnamegerîye yê Unîversîteya Dîcleyî yê Amedî reya ewil mezûn benê. Merasîmê mezûnîyetê Salona Celal Guzelses a unîversîteyî de yeno kerdene. Wendekaran waşt bi pankarto ke ser de fotografê rojnameger û nuştoxê kurdî Mûsa Anter (Apê Mûsa) est o û bi nuşteyî “Şagirtên Apê Mûsa Hatin / Wendekarê Apê Mûsayî Ameyê” şêrê merasîmê mezûnîyetî. Wendekaran ajansê ma rê eşkera kerd ke polîsî ke cilê înan sîvîl ê vernîya înan birnaya û pankartî asteng kerdo.
Ame zanayene ke polîsan bi manayê “ewleyî” û “nehuqûqî” berdişê pankartî yê zereyê salone qedexe kerdo. Wendekaran vat ke rayberîya unîversîteyî mudaxeleyê nê çîyî nêkerdo.
Polîsan asteng kerd, rayberî zî temaşe kerd
Wendekarêko ke mezûn beno ajansê ma rê qisey kerd û gazinê xo vera na rewşa îfade kerdê. Wendekarî dîyar kerd ke rixmê heme hewldayîşanê înan zî polîsan seba pankartî destûr nêdayo. Wendekarî îfade kerd ke nêzdîyê 22 wendekarî beşê rojnamegerîye ra mezûn benê û vat: “Rayberî û rayberîya beşê rojnamegerîye riyê ma ra zî nêewnîyayî. Mamosteyêkê ma ke hîrê çar serrî yo ders dano ma, ma ra vat, ‘mi eleqedar nêkeno.’ Riyê ma ra zî nêewnîya.”
Wendekaran astengîye şermezar kerd
Merasîmî ra pey wendekarî tewrê pankartê xo vejîyayê teber û vernîya unîversîte de astengkerdişê pankartî şermezar kerd. Wendekaran pankartî akerd û sloganî “Çapemenîya Azade nêyena bêvengkerdene” vat.
