Seba rayraşîyayîşê ke do 1ê Êlule de Amed de bi sloganê “Seba awankerdişê komelê demokratîkî ma ver bi aştîye rayra şinê” bêro viraştiş, vengdayîşê tewrbîyayîşî ame kerdiş.
Amadekarîyê rayraşîyayîşê ke do 1ê Êlule Roja Aştîye ya Dinya de, bi pêşengîya Platformê Kede û Demokrasî yê Amedî û Platformê Sazîyanê Demokratîkan bêro viraştiş, dewam kenê. Rayraşîyayîşo ke do bi sloganê “Seba awankerdişê komelê demokratîkî ma ver bi aştîye rayra şinê” bêro viraştiş, do 1ê Êlule de verê Zindanê Amedî ra dest pêbikero û heta verê AZC Plazayî yê ke semtê Ofîsî de yo, dewam bikero.
Vengdayîş
Komîteya amadekar banê DEM Partî yê Amedî de eşkerayîyêke da. Hemserêkê DEM Partî yê Amedî Abbas Şahînî da zanayîş ke ê prosesêkê neweyî de yê û wina va: “Ma vengê şarê xo danê rayraşîyayîşî, no rayraşîyayîş do seba çareserîya demokratîke ya meseleya kurdan û awankerdişê komarêka demokratîke bêro viraştiş.”
Hereketê Cinîyan ê Azadan (TJA) ra Bahare Pekere zî îfade kerd ke ganî têkoşînê seba aştîyêka daîmî bêro berzkerdiş û vengê her kesî da ke tewrê rayraşîyayîşî bibo.
