Verfeka Partîya DEMî Ayşegul Dogane derheqê rojdemî de kombîyayîşê çapemenîye kerd û vera qedexekerdena ziwanî reaksîyon nîşan da. Dogane ercnayîşê xo de va “Ganî Komîsyon goştarîya Ocalanî zî biko.”
Verfeka DEM Parti Ayşegul Dogane, derheqê babetê ke rojevede rê eşkerayîye dê.
Verfeka Partîya Têduştî û Demokrasî (DEM Parti) Ayşegul Dogane merkezê partîya xo de kombîyayîşê çapemenîye kerd û babetê ke rojevederê î ercnayî.
Kombîyayîşê vizêrî de dayîkanê haştîye ra Nezahat Teke waşt bî ke ziwanê xo de qisey bikero. La belê Serekê Meclîsî Numan Kurtulmuşî destur nêdabî ci. Ayşegul Dogane vat ke: “Ganî Komîsyonê Demokrasî, Wayûbirayî û Paştdayîşê Neteweyî kamilîye nîşan bidêne û Nezahat Tekeye ziwanê dayika xo de qisey bikerdêne.”
Tirkîya 93î ra nat haştîye ra gêreno
Ayşegul Dogane va ke ma sey Partî derheqê nê prosesê Haştî û Komela demokratîke de kar û xebatê xo bi birkî domkenê. Ayşegul Dogane va ke Tirkîya 93î ra nahetêrîyo ke dima haştîya xo gêrena. Ma eşkenê vajê peynîya peyenede nê gêrayîşî no hefte xebatê nê Komîsyonî de zî xo nîşan da.
Heta nika 5 Kombîyayîşî ameyî kerdene. Nê kombîyayîşanê pêyênan de goş dîya serê kesê ke nê şerî de nêzdîyê xo kerdê vîndî. Na gamê de muhîma. Ma dî ke mesela zaf kura. Ganî hem koka na mesela hem zî sebebê na mesela rind bêro famkerdene û goreyê aye zî gamî bêrê eştene.
Ganî Komîsyon goştarîya Ocalanî zî biko
Ayşegul Dogane qiseykerdişê xo de ca da pêvînayîşê Rayberê Şarê Kurdî Abdullah Ocalanî û wina va: “Birêz Ocalanî bi lîderîya xo vernîya nê prosesî kerde a û arde nê rojan. Seba haştîyêka mendîye no komîsyon ganî birêz Ocalanî goştarî biko. Ganî no teyna sey waştena Partîya DEM’î nêro zanitene. Ma behsê meseleyêka seserreye kenê. Ganî gamê bi cesaret bêrê eştene. Komîsyon çi metodî tede pêvinayîş keno ganî mabênê xo de ser ro vindo û yew raye bivêno.”
