Parlamenterê Partîya Gelecekî Kanî Torun, derheqê rewşa prosesî de dîyar kerd ke wa bi lezûbez komîsyon Meclîs de bêro awankerdiş û seba PKK’ijan zî rayîrê sîyasetî bêro akerdiş.
Dima vengdayîşê ‘Aştî û Komelê Demokratîkî’ yê Rayberê Şarê Kurdî Abdullah Ocalan ê 27ê Sibate de, çareserîya persgirêka kurdî derbasî merheleyêka newe bî, PKK’î kongreya xo ya 12. viraşt û qerarê xofesîhkerdişî da. Dima zî bala raya pêroyî şî ser gamanê dewlete, hetanî nika zî hetê dewlete tu gamêk nêameya eştiş.
Parlamenterê Partîya Gelecekî yê Bursayî Kanî Torun derheqê serûbûtanê peynî ser o MA’yî rê qise kerd.
Torun dîyar kerd ke kesanê ke rayîrberîya pêvajo de ca gênî bi qerar ê û wina va: “Na babete de persgirêk çin o, persgirêk ez dîyena nê qerar hema zî nêkewtî merîyetî. Bena na yew girseya xo ya partîye ra rave bikerî û kombîyayîşan bivirazî. Eke hewteyê bêro çek bêro ronayîş, wa bi lezûbez sereraştkerdişê huquqî û qanûnî bêrê kerdiş. Eke çek bêro ronayîş do her di hetî zî bi ser bikewê, dewlete zî PKK zî. Do komel zî aram bibo, na yewe zî zaf avzel a. Ma zî do paştgirîya xo bidê na prosese.”
Torun destnîşan kerd ke wa bi lezûbez komîsyon Meclîs de bêro ronayîş û wina domna: “Seba heme kesanê ke çek ronayeyî, bieşkerî bêrê welat. Erka komîsyonî ke do Meclîs de bêro awankerdiş na ya. Wa Tirkîya zafêr demokratîk bibo, astengîya yewîne ya verê prosesî de şerê desthilate ya bi CHP’î ra ya. Wa AKP nê prosesî qurbanê nê şerî nêkero.”
