Rayvera MEDYA-DER’î Menîce Yenî ser vengdayîşê Rayverê Şarê Kurdî Abdullah Ocalan dîyar kerd ke vengdayîşê Ocalanî seba şarê tirk û kurd rayîrê çareserî û aştî yo, wa nê dayîkê lejker û polîsan nê zî kurdan bibermî.
Vengdayîşê Rayverê Şarê Kurdî Abdullah Ocalanî ser o Rayvera MEBYA-DER’î ya Amedî Menîce Yenî ajansê ma rê qise kerd.
Rayvera MEBYA-DER’î ya Amedî Menîce Yenî destnîşan kerd ke kurd verba heme hêrişî yê gamê negatîfî, hewna zî destê aştîye, dergê ewlete kenê û wina va: “Kurdî wazenê êdî Tirkîya de aştî û demokrasî bibo, seba ke wa dewlet gamê şênber bierza.”
Ma aştî û aramî wazenê
Menîce Yenî da zanayîş ke dima vengdayîşê Rayverê Şarê Kurdî Abdullah Ocalan ê 27ê Sibate, şarê kurd goreyê vengdayîşî hereket kenê û wina domna: “La qey hema zî gam hetê dewlete nêameya eştiş? Adirbest ameyo îlankerdiş zî agahîyê şehîdan yenê. Eke dewlete wazena aştî û aramî pê bîyara û Tirkîya biba welatêkê demokratîkî wa dewlete ewilî hêrişan bi peynî bika.”
Menîce Yenî dîyar kerd ke binê nameyê muzakerayê aştî de bi top û tanqan hêrişê ciwanê kurdî kenê û wina qedîna: “Ma nê nêzdîbîyayîşê dewlete qebul nêkenê, ma sey sazîya keyeyê şehîdan no bêhuquqî qebul nêkenê. Ma hetkarî aştî û seyyewbînanî yê. Wa na gama weş, dewam bika. Rayverê Şarê Kurdî Abdullah Ocalan serbest bimano û heqê hêvîye bikewo merîyetî. Wa nê dayîkê lejker û polîsan nê zî kurdan bibermî.”
