Serrgêra 26ine komplo ser o bi rayberîya DEM Partîye Warê Şêx Seîdî ra hetanî Bircê Bizî ra meşêk ame viraştene. Meş de Wekîla Amedî Halîd Turkoglu va ke hêvîya înan aştîya bi rûmet a û wina va: “Ma wazenê ganî tecrîd çin bibo. 15ê Sibate seba ma rojêk tarî nê, roja azadîya kurd û şaran rê biba wesîleyêk.”
Serrgêra 26ine ya komploya verba Rayberê PKK’î Abdullah Ocalan ser o bi rayberîya DEM Partîye Warê Şêx Seîdî ra hetanî Bircê Bizî ra bi seyan meşîya. Meşî ra rayedarê DEM Partîye, DBP’î, sazî û dezgeyê sivîl û welatijê beşdar bîyê.
Beşdaran meş de pankartê “Emê roja tarî veguherînin roja azadiyê bêmîyan” akerd û bêmîyan siloganê “Berxwedan jiyan e”, “Bijî berxwedana Wanê”, “Bijî berxwedana gelê kurd”, “Ma do bi xoverdayişî qezenc bikerê”, “Jin jiyan azadî”, “Bimre koletî, bijî azadî”, “Wa Amed îradeya xo ra wayîr bivejo” qîra û yew bi yew nameyê şaredarîyê ke qeyûm ameyê tayînkerdene qîrayê û vatê nê şaredarîyan ê ma yê.
Hesabê sîyasî
Meş de sifte Hemserekê DEM Partîye ya Amedî Abbas Şahîn qise kerd û va ke ê çiqas demokrasî vatê, verba înan zî ewqas hesabê sîyasî ameyo kerdene û wina va: “No şar qey bawerîya şima bikero, çimkî şima xo rê bawer nêkenê. Ti huquqê xo ra bawer nêkenê, behsa huquqê mîyanêneteweyî kenê la nêşuxulnenê. Ma bi serran vatê; tecrîd est o la her tim hêrişê ma kerdê, nika çi bî? Meclîs partîya muxalefetî va eya ma tecrîd şuxulnenê, dima destê xo derg kerd û vat ke wa Birêz Ocalan bêro Meclîs û vengdayîşêk bikero. Şima demo ke tenganêy kewenê, wazenê ma bikar bîyarê la şima nêeşkenê ma bikar bîyarê. Ma zanenê bi îradeyê xo estbîyayişê xo awan bikerê, ma vanê; azadî û demokrasî. Zerrîpak bibê û şima Meclîs de çi qise kerdê, peynî ci de bivinderê. Hesabê sîyasî yê şenikî mekerê, 26 serrê ke şima tecrîd şuxulnayê la nika şima wazenê pêvajoyêk bidê destpê kerdene bi Birêz Ocalan rê, çimkî şima zanenê sewbî çareserî çin a. Eke şima wazenê problemê kurd bi demokrasî çareserî bikerê, ganî tecrîd bihewanîyo û fek tayînkerdişê qeyûman veradê.”
Roja tarî wa biagêra roja azadîye
Wekîla Amedî Halîde Turkoglu zî aşkera kerd ke Birêz Ocalan seba çareserî her tim waşt muzakerayan bikero, no ser têkoşîn da û wina domna: “Hêvîya ma aştîya bi rûmet a û no ser zî ma wazenê ganî tecrîd çin bibo. 15ê Sibate seba ma rojêk tarî nê, roja azadîya kurd û şaran rê biba wesîleyêk. Çi heyfo ke ewro Şaredarîya Wanî bi hêrişêk qeyûm tayîn kerdê, hêrişê polîsan çarçiweya polîtîkaya îşxalî ame kerdene. No nîşan da ke polîtîkaya dişmenî ra israr kenê, ma zî no ser îqtîdar lanet kenê. Şima çi bikê zî ma qebûl nekenê. Şima nê seserra ke şarê kurd înkar kerd û şarê kurd bi desan îqtîdaran dî, hetta zaf îqtîdarî verba kurdan polîtîkayê qirkerdişî şuxulnayê. Eynî polîtîkayan de problemê kurd çareser nêbeno. Kurdan wazenê îradeyê xo bipawê û şima hewna do vînî bikerê.”
Peynîya qiseyan Hemserekê DBP’î yê Amedî Mehmet Şîrîn Gurbuz beyanato nuşteyî wend û beyanat pêvajoya newe ser bal ame antiş û peynîya wendişê beyanatî zî girse çalakîya roniştişî kerd.
