Sazgehê demokratîk û partîyê sîyasî bi munasebetê serrneweyî girewteyan rê kartî erşawitî. Hemserekê Şubeyê TUHAY-DER’î yê Wanî Osman Başak ke erşawitişê kartan ra ver qisey kerd waşt girewteyê sîyasî veradîyê û hêvî kerd ke serra 2026 bibo serra biba serra azadîya şaran.
Sazgehê Demokratîk û partîyê sîyasî ê Wanî bi pêşengîya Şubeyê Komela Hetkarîya Keyeyanê Girewte û Hukimwerdoxan reyde (TUHAY-DER) a Wanî bi munasebetê serneweyî girewteyan rê kartî erşawitî. Girseyo ke verê erşawitişê kartan verê PTT’yî yê taxa Rêya Armûşî yê Wanî de eşkerayîyêk da. Eşkerayî de sloganê “Bijî berxwedana zindanan” ame berzkerdiş. Parlamenterê DEM Partî yê Wanî Mahmud Dîndar, temsîlkarê sazgehan û zaf merdimî tewrê eşkerayî bîyî.
Hemserekê Şubeyê TUHAY-DER’î yê Wanî Osman Başak eşkerayî de qisey kerd û bale ant prosesê “Aştî û Komelê Demokratîkî” ser o û dîyar kerd ke rixmê prosesî zî zafê zîndanan de girewteyan ser o tedayî dewam kenê. Osman Başakî da zanayene ke heqê girewteyan yeno binpaykerdiş û vat: “Ma wazenê heta sernewe girewteyan veradê û wa binpaykerdişê heqan biqedîyo. Bi seyan girewteyî nêweş, girewteyê emrê girdî est ê û ma wazenê ê bêrê veradayene. Sewbîna ma wazenê semedê birêz Ocalanî heqê hêvî bêro caardiş. Ma do bi munasebetê serrneweyî girewteyan rê kartan bierşawê. Hêvîya ma a ya ke serra 2026î biba serra azadîya pêro şaran, cuya têduşt û caardişê huqûqî.”
Parlamenter Mahmud Dîndarî zî qisey kerd û dîyar kerd ke prosesê “Aştî û Komelê Demokratîkî” semedê pêro şaran firsendêko gird o û waşt serra 2026. biba serra azadîye.
Dimayê eşkerayîye girewteyan rê kartî ameyê erşawitiş.
