Platformê Sazgehanê Demokratîkî ê Wanî, derheqê kiştişê ciwanê kobanî Baran Ebdî ke Tarsusê netîceyê hêrişêke nijadperest de cuya xo vîndî kerdbî rayîrşîyayîşêk viraşt û eşkerayî da. Eşkerayî de vengdayîşê paştîdayena seba Rojava ame kerdene.
Platfomê Sazgehanê Demokratîkî ê Wanî, seba ciwanê Kobanî Baran Ebdî ke vizêrî qezayê Mêrsînî Tarsûs de hetê kesê ke MHP’yî amebî qetilkerdene, rayîrşîyayîşêk ame viraştene û eşkerayî daye. Girse awanîya DEM Partî yê qezaya Artemêtan ra heta kuçeyê Hunerî rayîrşîyê û “Bijî berxwedana Rojava”, “Yek e yek eyek gele kurd yek e”, û “Wê Rojava ji DAIŞê re bibe goristan” ameyê berzkerdene. Hemşaredarê şaristanê girdi ê Wanî Neslîhan Şedal û Abdullah Zeydan, parlementerê DEM Partî yê Wanî Gulderen Varli û Zukuf Uçar, hemserekê DBP û DEM partî yê Wanî, temsîlkarê sazgehanê sivîl û xeylê welatijî tewrê rayîrşîyayîş û eşkerayî bîy.
‘Ma do tim wayûbirayanê xo reyde bê’
Hemşaredar Abdullah Zeydan kuçeyê Hunerî de qiseyê kerd û vat şarê Rojava 13 serre yo verva hêrişanê çeteyanê DAIŞ’î tewr wehşîyane ke sereyê merdiman tira kerde, merdimî veşnayê û hêrişê erjê merdimîye kene, xoverdayîşêko pîroz dane. Abdullah Zeydanî dîyar kerd ke nê çeteyan reyna dest bi hêrişan kerdo û vat: “Şarê Rojava seba ma xeto sûr o û amancê înan qirkerdişê şarê Rojava yo, ma ti wex nêverdenê şima şarê ma qirbikerê. Do şaro kurd wayûbirayanê xo yê Rojava reyde vindero.
Şarê Rojava ti wext zordestî, zulim ê teda ro tu kesî nêkerda. Kes qetil nêkerdo ti wext teda ro turkmen, ereb, durzî ê bînan nêkerdo. Ma kurdî û homayî ma dayê na dinya, heqê ma est o ke ma erde xo ser o azad biciwîyê. Nê sebebî ra ma tim wayûbirayanê xo yê Rojava reyde yê.”
‘No komplo yo’
Abdullah Zeydan dîyar kerd ke eke dewletê nê prosesê “Aştî û Komelê demokratîk” de samîmî bo, ganî dest nê hêrişanê serê kurdan verado. Abdullah Zeydanî ard ziwan ke ganî mertalê polîsan ê vernîya kuradan wedaro û wina vat: “Eke ma bira bê, ganî şima zî vajê ‘ma pîya destkewteyanê kurdan bipawê. La çi heyf ke ma vînenê sey nêzdîbîyene ke provakatîf ewro paştî dane nê çeteyan. Vizêrî 5 gedeyê kurdan serdan û vêşanî ver cuya xo vîndî kerde. Reyna vizêrî Reqa de keyeyê ke kurdî ra 6 kesî ameyê qetilkerdene. No şodir gedeyêko 13 serre serdan ver cuya xo vîndî kerd. Sewbîna xortêko ciwan yê kobanîyij Baran Ebdî ke Mêrsîn de ciwîyayne, netîceyê hêrişêke de cuya vîndî kerde. Qetilkerdena Baran Ebdî komployêko eşkera bî. Walî zî îşaret da wazênê nê kiştişî serê ci bigîrê û bi nimitnê. Ganî dewletê ke mîyanê komployî de yê bilez nê kayanê xo yê qilerinanê ke serê Rojava ra veradê. Ma do her tim kişta şarê xo yê Rojava de bê û ma ti wext înan tena nêverdenê.”
