Badê operasyonanê “Hêrso Epîk” yê Amerîka-Îsraîlî yê vera Îranî şer heme herême ra vila beno.
Wezaretê Pawitişî yê Kuweytî eşkera kerd ke dişeme serê sibayî çend teyarayê şerî yê Amerîka kewtî. Ekîbê muretabatî candar xelas bîyî û rewşa înan stabîl a. Derheqê sebebê qeza de eşkerayîyêka fermîye nêameye dayene.
Îran ra Tel-Avîv, Hayfa û Qudusê Rojhelatî ser o hêrişê fuzeyan
Eşkera bî ke “pêlo desin” yê hêrişan Îsraîlî ser o destpêkerd. Kompleksê hukmatî yê Tel-Avîvî, merkezê leşkerî û emnîyetî yê Hayfa û Qudusê Rojhelatî ameyê hedefgirewtene.
Lubnan de bilanço giranêr beno
Hêrişanê hewayî yê Îsraîlî yê vera Lubnanî de tewr kêmî 31 kesî cuya xo ra bîyî û 149 kesî birîndar bîyî. Serfermandarê Artêşa Îsraîlî Eyal Zamîrî eşkera kerd ke hemverê Hizbullahî de “hêrişan” destpêkerd. Serekwezîrê Lubnanî Nawaf Selamî hêrişê roketan ê Hizbullahî “gamêka bêberpirsîyare ke welatî dekeno talûke” nirxna.
Vakur Rojawanê Îranî de 27 kesî merdî
Wîlayetê Azerbaycan ê Rojhelatî yê Îranî de di rojanê peyênan de hêrişanê Amerîka-Îsraîlî de tewr kêmî 27 kesî merdî.
Nêzdîyê Hewlêr de teqayîşî
Dormeyê teyaragehê Hewlêrî de ke hêzê koalîsyonê bi serkêşîya Amerîka tede yê, vengê teqayîşan ame eşnawitene. Sîstemê pawitişê hewayî teyarayê bêpîlotî eştê.
OPEC+ berhemardiş zêde kerd
Seba ke şerî rayîranê sevkîyatê petrolî tehdîd kenê, Erebîstana Suudî û Rusya bi dewletanê bînan ê OPEC+ reyde seba aşma nisane kotaya berhemardişî kerd zêde. Pisporî vanê ke heta ke Tengîya Hurmuzî de rîsk dewam keno no zêdkerdiş nêşêno vayîye bikero normal.
28ê sibate ra heta nika
Amerîka û Îsraîlî 28ê sibate de vera Îranî operasyon da destpêkerdene. Rayberê dînî yê Îranî Alî Hamenî merd. Îsraîlî eşkera kerd ke 40 fermandarê berzî yê Îranî ameyê kiştene. Îranî bi fuze û teyareyanê bêpîlotan cewab da Îsraîl û dewletanê Xelîcî. Dewletê Ewropa mesajê “gama pawitişî yê normalan” da. Bi seyan firayîşî ameyî betalkerdene û warê hewayî ameyî girewtene.
